Mańǵystaýdaǵy Qoshqar ata kóline 100 mln tonnadan astam zııandy qaldyqtar jınalǵan
AQTAÝ. QazAqparat - Qoshqar ata qaldyq kóliniń radıoaktıvti jáne hımııalyq zııany týraly oblystyq tabıǵı resýrstar jáne tabıǵat paıdalanýdy retteý basqarmasynyń bólim basshysy Narynbek Suńǵatov aıtyp berdi, dep xabarlaıdy QazAqparat tilshisi.
Oblystaǵy basty ekologııalyq máselelerdiń biri - Qoshqar ata qaldyq qoımasy. Onda Kaspıı aımaqtyq taý-ken metallýrgııa kombınatynyń úsh zaýytynyń 105 mln tonnadan astam qaldyǵy jınalǵan. Onyń ishinde jıyntyq belsendiligi 11,2 myń Kıýrı 51,8 mln tonna álsiz radıoaktıvti qaldyq bar.
Narynbek Suńǵatovtyń aıtýynsha, oıpattyń ońtústik bóliginde arnaýly joba jasaqtalmastan, 1994 jylǵa deıin hımııa-gıdrometallýrgııalyq zaýyttyń qatty radıoaktıvti qaldyqtary kómilgen. Qoshqar ata qaldyq qoımasynyń ońtústik-shyǵys bóliginde Kúkirt qyshqyly zaýytynyń óndiristik qaldyqtary jatyr. Osylardyń áserinen qazir Aqtaý qalasy men Munaıly, Túpqaraǵan aýdandarynyń halqy men tabıǵı ortasy «ekologııalyq qysymda» tur.
«Osyǵan oraı, Qoshqar ata qaldyq qoımasynyń ekologııalyq jaǵdaıyn turaqtandyrý jumystary júrgizilip keledi. Ýytty qaldyqtardyń shańytýyn báseńdetý maqsatynda qaldyq qoımasyna jyl saıyn Aqtaýdyń kárizdik tazartý qondyrǵysynan shyqqan 8-8,5 mln tekshe metr sý aıdalady», - deıdi Narynbek Suńǵatov.
Onyń ońtústik jáne ońtústik-batys betinde 2015-2017 jyldary 8,2 ga jasyl qorǵanysh beldeýi ósirilse, odan keıin 2017-2019 jyldary 30 ga aýmaqqa jasyl beldeý ósirile bastady.
«2018-2020 jyldar aralyǵynda oblys ákiminiń qoldaýymen taǵy 50 ga aýmaqqa jasyl qorǵanysh beldeýi quryla bastady. Barlyǵy - 88,2 ga bolsa, 2018 jyly sonyń 50% oryndaldy. 2019-2020 jyldary tolyqtaı aıaqtaý josparda bar», - deıdi Narynbek Suńǵatov.
Qaldyq qoımasynyń el qonystanǵan jıekteri jasyl qorǵanysh beldeýimen tolyq qorshalyp shyqqanǵa deıin jumys jalǵasa bermek.
