Mańǵystaýdaǵy bekire fermasy 2,5 myń tonna balyq satty
Búgin Mańǵystaý oblysynyń ákimi Serikbaı Trumov Túpqaraǵan aýdanyna qarasty Aqshuqyr aýylynda ornalasqan óńirdegi jalǵyz bekire fermasyna baryp, sharýa qojalyqtarynyń ókilderimen kezdesti. «Kazakh osseter» ǵylymı-óndiristik kásiporny 2014 jyldan beri erekshe tuqymdas balyq ósire bastady. 2015-2017 jyldary salmaqtary normatıvke saı 10 000 dana bekire tuqymdas balyqtar satyldy.
Sońǵy 3 jylda 52 tonna balyq óndirildi. Búginde bekire fermasy óz ónimin búkil Qazaqstan aýmaǵy men shet elderge jóneltedi. Birneshe jyldan beri taýar Reseı men Grýzııaǵa jiberilip jatyr. Ótken jyly« Kazakh osseter « kompanııasy 9 tonna bekire balyǵyn satylymǵa shyǵardy, onyń 1,5 tonnasy eksportqa ketti. Al, bıylǵy jyldyń birinshi toqsanynda 2,5 tonna satyldy. Qazirgi ýaqytta fermanyń 38 basseıniniń árqaısysynda orys, Sibir bekiresiniń shabaqtary, belýga, sterlet jáne basqa bekire tuqymdas býdandar ósirilýde.
Kezdesý barysynda balyq sharýashylyǵymen aınalysatyn kásipkerler oblys ákimine sharýashylyqtary boıynsha tanystyrylym jasap, máselelerin ortaǵa saldy.
«Segizbaı Ata aýylsharýashylyq kooperatıvi» ÓK Mańǵystaý aýdany Shetpe kentinde 2017 jyly óz kásibin bastaǵan. Alǵashqyda túıe, jylqy, qoı etterin konservileýmen shuǵyldansa, keıin balyqqa kóshken. Búgingi tańda óndiristik kásiporynda 2 tseh, 10 jáne 5 tonnalyq tońazytqysh kameralary, balyq tazalaıtyn oryn jáne kúnine 400 sht konservileý júrgizetin apparattar qoldanylady. Sonymen qatar, syıymdylyǵy 500 kelilik ystaý kamerasy ornalasqan.
2018 jyly «Caspian Fish @ 12» kásiporny «Damý» RMF» AQ qoldaýymen «Nur Kapital» baǵdarlamasy boıynsha sýbsıdııa alyp, Qaraqııa aýdany Teńge aýylynda balyq ónimderin óńdeýge arnalǵan úlken ǵımarat saldy. Negizgi maqsattary: balyq ónimderin óńdeý, bólshekteý, keptirý, tuzdaý. Kásiporynda Reseıden ákelingen syıymdylyǵy 25 tonna muzdatqysh jáne 5 tonna tońazytqysh kameralar, syıymdylyǵy 200 kelilik ystaý jáne 150 kelilik keptirý kameralary bar.
Sonymen qatar, «Bólekbaev» jeke kásipkerligi Qarakól kólinde qýattylyǵy jylyna 30 tonna toǵandyq balyq (sazan) sharýashylyǵyn damytý jobasyn ınvest joba retinde qarap, kadastrlyq jospary alynǵan. Aqtaý qalasy ákimdiginiń sheshimi negizinde 2025 jylǵa deıin jaldaý quqyǵymen kelisimshart jasaldy. Qazirgi ýaqytta QR EGTRM Orman sharýashylyǵy jáne janýarlar dúnıesi komıtetinen kelisim alynyp, jobalyq-smetalyq qujattamasy jasaqtalyp, memlekettik saraptamadan ótýge joldanǵan.
Sharýa qojalyqtary kásibin dóńgeletýge qajetti máselelerin aıtyp, qoldaý kórsetýdi surady. Aımaq basshysy sharaýalardyń ótinishi jeke qaralyp, tıisti sharalar qabyldanatynyn jetkizdi.
