Mańǵystaýdaǵy aýyl muǵalimi anımatsııalyq mýltfılmder jasaıdy
Onyń bul salaǵa degen qyzyǵýshylyǵy muǵalim bolǵan alǵashqy kúnnen-aq bastalǵan. Bul týraly Munaıly aýdany ákimdiginiń baspasóz qyzmeti habarlady.
«Negizi bul ıdeıany tastaǵan oqýshylarym boldy. Ǵylymı jobaǵa oqýshy daıyndap júrgenimde «Apaı, nege mýltfılm shyǵarmaımyz?» degen saýal qoıdy. Sodan izdenip, bastadym. Nátıjesinde birneshe anımatsııalyq rolık paıda boldy. Qazir men daıyndaǵan anımatsııalyq rolıkter mektebimizdiń oqýshylary men ata-analaryna taratylady», - dedi Aıgerim Mýftýllaeva.
Jas muǵalimniń eń alǵash jasaǵan anımatsııasy – ata-analar men mektep oqýshylaryna arnalǵan nusqaýlyq. Kóp aqparatty qabyldaý úshin anımatsııa tásilin tıimdi sanaǵan muǵalim bul ıdeıany ata-analar jaqsy qabyldaǵanyn aıtady.
«Ózim qazaq tili men ádebıeti pániniń muǵalimi bolǵandyqtan, anımatsııa arqyly óz pánime ıntegratsııa jasaýdyń ádisterin qarastyrdym. Birden ertegilerdi mýltfılge aınaldyrýdy qolǵa aldym. Qazir oqýshylarmen ǵylymı jobalarǵa daıyndalyp júrmiz. Máshhúr Júsip shyǵarmalarynyń anımatsııalyq versııasyn shyǵarýdy qolǵa aldym. Bastamam oń nátıjesin berse, bul jobalarymdy keń kólemde damytý oıymda bar», - deıdi Aıgerim Mýftýllaeva.
Aıta keteıik, Aıgerim Mýftýllaeva 2019 jyly Munaıly aýdanynyń «Úzdik jas mamany» atandy.