Mańǵystaýdaǵy Amal merekesi: Otpan taý basynda «birlik oty» jaǵyldy
ASTANA. QazAqparat - Mańǵystaýda Amal merekesi atap ótilýde. Respýblıkanyń túkpir-túkpirinen kelgen jurtshylyq «Otpan taý» tarıhı-mádenı kesheninde bas qosty. Qaz-qatar alpysqa jýyq aqshańqan kıiz úıler tigilip, túrli mádenı, sporttyq sharalar men qolóner sheberleriniń kórme-jármeńkesi ótýde, dep habarlaıdy QazAqparat tilshisi.
Mańǵystaýǵa sóz ben ulttyq dástúrdi qasterlegen aqyn-jazýshylar, ánshi-jyrshylar, qoǵam qaıratkerleri men zııaly qaýym ókilderi jınaldy. Olar «Otpan taý» basy - birliktiń mekeni dep sanaıdy. Merekege kelgen halyqtyń qarasy kóp boldy. Olardy tigilgen kıiz úıler aldynda aq oramal taqqan kelinder jyly shyraımen qarsy alyp, úlken yqylaspen et pen sháıin usyndy.
Sharanyń ereksheligi, bıyl ol respýblıkalyq deńgeıde uıymdastyrylyp otyr. Uıymdastyrýshylardyń aıtýynsha, kıiz úı tizýde óziniń ásemdigimen, kórkimen, kóz jaýyn alatyn jabdyqtarymen mańǵystaýlyqtar kósh bastap tur.
Ala tańmen Shetpedegi atshabarda 25 shaqyrymdyq alaman báıge men 9 shaqyrymdyq qunan jarys ótti. Sonymen qatar ulttyq oıynnyń jalaýy jelbirep, aýdaryspaqtan jigitter kúsh synasty.
Otpan taý basyndaǵy dúbirli toı ulttyq bı men ánge toly boldy. Sheberlerdiń kórmesinen keregin alǵan turǵyndar da máz-meıram.
Sondaı-aq Jetisý, Arqa, Syr, Batys, Altaı-Tarbaǵataı jyr mektepteri ókilderi men «Men qazaqpyn» mega jobasy júldegerleriniń qatysýymen kontserttik shara, dástúrli ánshi-jyrshylar A. Kómekovtyń, A. Elshibaevanyń, Á. Sarınniń, Sh. Súleımenovtiń, N. Janamanovtyń jáne Ó. Aınııazovtyń qatysýymen jyr keshi ótti.
«Mereke qutty bolsyn! Amal keldi, toı bastaldy! Mańǵystaý jyrdyń eli, Qashaǵannyń, Abyl, Aqtannyń, Súgirdiń, Táttiǵuldyń eli. Munda kelgen halyq jyr-terme tyńdamaı ketpese bolmaıdy», - deıdi «Men qazaqpyn» mega jobasynyń júldegeri Ospan Qulsymaq.
Búgin sonymen qatar amal merekesi men «Otpan taýǵa» arnalǵan dóńgelek ústel otyrysy ótti. Oǵan Máshhúr-Júsip murajaıynyń, Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq mýzeıiniń, «Qorqyt Ata» memorıaldyq mýzeıiniń, «Áziret-Sultan» memlekettik tarıhı-mádenı qoryq-mýzeıiniń, «Ulytaý» ulttyq tarıhı-mádenı tabıǵı qoryq murajaıynyń, «Han ordaly Saraıshyq» mýzeı-qoryǵynyń ókilderi qatysty.
Al keshki saǵat 20.00-de teńiz deńgeıinen 532 metr bıiktegi Otpan taý basynda «birlik oty» jaǵyldy. Bul - batyrlarymyz ben bılerimizdiń bas qosyp, taǵylymdy sheshim qabyldaǵan jeri. Mańǵystaýdyń san qıly syn saǵattarynda uran otyn jaǵyp, máńgilik otyn mazdatqan taǵzym bıiginde amal merekesi osylaı dúbirlep ótti. Shara erteń de jalǵasyn tabady.
