Mańǵystaýdaǵy abaqtydan qylmyskerlerdiń qashý áreketine qatysty qylmystyq is aıaqtaldy
ASTANA. Qazannyń 11-i. QazAqparat /Aıdar Ospanalıev/ - Bas prokýratýranyń qaýlysymen arnaıy qurylǵan tergeý toby Mańǵystaý oblysynyń qylmystyq atqarý júıesiniń mekemesinen qylmyskerlerdiń qarýly shabýyl arqyly qashý áreketi boıynsha qylmystyq isti aıaqtady. Bul týraly búgin jýrnalıstermen bolǵan brıfıngte Bas prokýratýranyń resmı ókili Jandos Ómiralıev málim etti.
Onyń sózine qaraǵanda, jalpy sany 21 adamnan turatyn qylmystyq top qatań tártiptegi qylmystyq jazasyn ótep jatyp, aldyn ala aýyz jalasyp, maýsymnyń 22-si kúni qarý qoldana otyryp, mekemeden qashyp shyqty. «Atalmysh tergeý toby qylmyskerler qashqan mekemeniń bastyǵy M.Jańahmetov, onyń orynbasary Sh.Halmenov, Jedel bólim bastyǵy T.Ysqaqov, Kolonııa bastyǵynyń kezekshi kómekshisi M.Nurseıitovke qatysty da qozǵalǵan qylmystyq isterdi aıaqtady. Qylmyskerler atalǵan azamattardyń óz mindetterine degen nemquraılylyǵy saldarynan qashýǵa múmkindik alǵan. Osyǵan baılanysty M.Jańahmetov pen Sh.Halmenovke «qyzmet babyn teris áreketterge paıdalanyp, onyń sońy qaıǵyly jaǵdaıǵa dýshar etti» degen aıyp taǵyldy. Atalǵan isterdiń barlyǵy Aqtaý qalalyq sotyna jiberildi», - dedi resmı ókil.
