Mańǵystaýda jylqy úıirinen tabylǵan qulan erkine jiberildi

AQTAÝ. QazAqparat – Mańǵystaý oblysynyń Beıneý aýdanynda jergilikti sharýa qojalyǵyna tıesili bir úıir jylqynyń arasyna qosylyp ketken qulandy mamandar tekserip qarap, erkindikke jibergen, dep habarlaıdy QazAqparat tilshisi.

Qazaqstan bıoártúrlilikti saqtaý qaýymdastyǵyna Mańǵystaý oblysy Beıneý aýdanynda jylqylar úıirinde júrgen qulannyń sýreti jiberilgen.

«Qulannyń artezıanǵa alys emes jerde jaıylyp júrgen jylqylardyń úıirine qosylyp ketkendigin jergilikti turǵyndar habarlady. Aýdandaǵy áriptesimiz baryp qulannyń jaraqaty bar, aıaqtarynyń baılaýly ekenin kórdi. Jaǵdaıyn ortasha dep baǵalap, dala janýaryn óz erkine bosatyp jiberdi», - dep jazylǵan qaýymdastyqtyń áleýmettik paraqshasynda.

Mamandardyń boljamy boıynsha, qulannyń 2-3 jasar aıǵyry óńirge Barsakelmes qoryǵynan kelgen. Oǵan dálel – janýardyń tuıaqtary. Burynǵy Aral teńiziniń túbin meken etetin qulandardyń tuıaqtary osyndaı jalpaq, qajymaǵan keledi. Óıtkeni, olar jumsaq qum jáne laı ústimen júredi. Bul – tóńirekke jalǵyz qulannyń úshinshi ret kirýi.

Jalpy, Qazaqstanda qulandar «Barsakelmes» qoryǵy, «Altyn-Emel» ulttyq parki, «Ańdasaı» qaýmaly jáne «Altyn Dala» rezervaty aýmaqtaryn mekendeıdi.