Mańǵystaýda jyldyń úzdik mamandary anyqtaldy

Dástúr boıynsha sharanyń basty qonaqtary - aımaqtyń ekonomıkalyq, áleýmettik jáne qoǵamdyq damýyna úlesin qosyp júrgen mańǵystaýlyqtar boldy.

2016 jyly «Jyl muǵalimi» nomınatsııasyna Aqtaý qalasynyń №13 gımnazııasynyń qazaq tili men ádebıet pániniń muǵalimi Maıramgúl Turbekova ıe boldy.

Ol qazaq tili men ádebıeti páni boıynsha tereń oılaý ádisterin paıdalana otyryp, halyqaralyq, respýblıkalyq, oblystyq «Nalanda», «Jarqyn bolashaq» olımpıadalaryna, «KAZAKHSTAN ART FESTIVAL», «Prezıdent - el tiregi» respýblıkalyq, shyǵarmashylyq saıystaryna kóptegen shákirtter daıyndaǵan.

Aqtaý qalasynyń №4 «Aqqý» balabaqshasynyń tárbıeshisi Zýhra Arynbasarova «Jyl tárbıeshisi» nomınatsııasyn jeńip aldy. Ol óziniń jumysynda sahnalyq daıyndyq ádisteri men topyraq terapııasyn qoldanady. «Vmeste veselo shagat», «Matematıka v detskom sadý» atty oqý-ádistemelik jınaqtary men ádistemelik jumystardyń avtory, sondaı-aq birneshe basylymdary respýblıkalyq jýrnal betterine shyqty.

«Jyl ǵalymy» nomınatsııasyna fılologııa ǵylymynyń kandıdaty, dotsent Ádilet Qabylov ıe boldy. Ádilet Qabylov, Sh. Esenov atyndaǵy Kaspıı memlekettik tehnologııalar jáne ınjınırıng ýnıversıteti «Qazaq tili men ádebıeti» kafedrasynyń professory, 2 monografııa, 1 oqýlyq, 10 oqý-ádistemelik quraldarynyń avtory. Sondaı-aq, ol 100-den astam ǵylymı maqala jáne ǵylymı-pýblıtsıstik ocherkter jazǵan. Ǵylymı-zertteý jumystarynyń basty baǵyty - qazaq ádebıetindegi satıra janry, Ábish Kekilbaevtyń shyǵarmalaryndaǵy keleke.

Oblystyq balalar aýrýhanasynyń travmotologııa jáne ortopedııa bólim meńgerýshisi Qurman Qaıranov, 2015 jyldan bastap óziniń basshylyǵymen 600-den astam ártúrli qıyn dárejedegi ota jasap, «Jyl dárigeri» nomınatsııasyn jeńip aldy. Osy jyly alǵashqy ret Aqtaý qalasynda Qurman Qaıranov jańa týylǵan náresteniń óńeshtik ótkeline endoskopııalyq tásilmen oıdaǵydaı ota jasady.

«Jyl meıirbıke» nomınatsııasyn Nazıra Erkebaeva aldy. Ol Beıneý aýdany aýrýhanasynyń Turysh feldsherlik-ambýlatorııalyq pýnktiniń meıirbıkesi.
28 jyl boıy shalǵaıdaǵy aýyl turǵyndaryna, Mataı men Shaǵyrly-Shómekeı mal sharýashylyǵy qojalyqtaryna úzdiksiz alǵashqy medınıtsınalyq kómek kórsetip keledi.

Іri joba «Aktau Open Fest» - jyl saıyn ótetin jastarǵa arnalǵan mýzyka men sport festıvaliniń avtory, oblystyq basketbol federatsııasynyń dırektory, «Doma Doma» qoǵamdyq qorynyń basshysy Samson Arakelıanǵa «Jyldyń Úkimettik emes uıymy» ataǵy berildi.

«Jyl jýrnalısi» «7292info.kz» pen «Ogni.kz» saıttarynyń redaktory, belsendi bloger Aıgúl Dádenge berildi.

«Jyl sportshysy» nomınatsııasynyń úzdigi - halyqaralyq dárejedegi estý qabileti buzylǵan múgedekter arasynan shahmat pen shashka oıyndarynyń sport sheberi, jeńil atletıka jáne ústel tennısi boıynsha Qazaqstan Respýblıkasynyń sport sheberi Natalıa Gorohova boldy. Qazaqstan Respýblıkasynyń birneshe ret dúrkin chempıony, shahmat oıyndary boıynsha Azııa chempıonatynyń kúmis júldegeri, Azııa oıyndarynyń jeńil atletıka men shahmat boıynsha álem chempıonatynyń qola júldegeri, 2009 jyldan beri Mańǵystaý oblysynyń múgedekterge arnalǵan sport mektebiniń sport nusqaýshysy bolyp jumys jasaıdy.

Jańaózen qalalyq ishki ister basqarmasynyń basshysy Amangeldi Dosjanovqa «Jyl polıtsııasy» ataǵy berildi. Onyń basshylyǵymen quqyqbuzýshylyq pen qoǵamdyq tártipti qadaǵalaý boıynsha biraz jumystar atqaryldy.

«Jyldyń mádenıet pen óner qyzmetkeri» nomınatsııasy boıynsha teatr men kıno ártisi, N. Jantórın atyndaǵy oblystyq mýzykalyq-drama teatrynyń jetekshi akteri Medǵat Ómirálıev atandy.

«Jyl fermeri» nomınatsııasynyń ıesi - Mańǵystaý aýdanynyń Ońdy aýylyndaǵy «Mátjan» fermerlik sharýashylyqtyń basshysy Qydyrqoja Manash boldy. Ol birneshe jyl qatarynan qaıyrymdylyqpen aınalysyp, turmysy tómen otbasylarǵa, ardagerlerge kómek kórsete otyryp, Basqudyq eldi mekenindegi aqsaqaldarǵa gazet basylymdaryna tegin jazylýdy uıymdastyrady.

«Jyl metsenaty» - jeke kásipker, Mańǵystaý oblysy Kık-Taıboksıng federatsııasynyń prezıdenti Aıtqalı Tileýmaǵanbetovke berildi. Ártúrli respýblıkalyq jáne oblystyq deńgeıdegi ótetin is-sharalardyń demeýshisi. Túpqaraǵan aýdany Aqshuqyr aýylyndaǵy sport kesheniniń jobasyn daıyndaýǵa tikeleı atsalysqan kásipker.

«Úzdik áleýmettik jumysshy» nomınatsııasynyń laýreaty Qaraqııa aýdany Jetibaı aýylynyń jumyspen qamtý jáne azamattyq aktilerdi tirkeý bóliminiń áleýmettik qyzmetkeri - Gúlbaný Mahambetova atandy. Múgedek balalarǵa sýret salý men qolónerdi úıretýge úlken nazar aýdarady. Qamqorlyqtaǵy adamdarmen arnaıy ońaltý baǵdarlamasy boıynsha jumys isteıdi.

«Jyl munaıshysy» nomınatsııasy boıynsha ómiriniń 37 jylyn munaı salasyna arnaǵan №1 «Qarajanbasmunaı» AQ munaı gaz óndiretin tsehtyń operatory Aqmurat Atshybaevqa berildi.

43 jyl boıy qurylys salasymen aınalysqan Maksım Ismaǵulov «Jyl qurylysshysy» nomınatsııasyn jeńip aldy. Óziniń jetistigi - memlekettik kirister departamentiniń ǵımaraty men Munaıly aýdany Baıandy aýylyndaǵy 960 oryndyq jergilikti mekteptiń qurylys jumystary dep sanaıdy.

«Turmystyq-kommýnaldyq sharýashylyqtyń úzdik adamy» «Kaspıı jylý, sý arnasy» mekemesiniń sýmen qamtamasyz etý bólimshesiniń joǵary sheberi Sádýaqas Jarlyǵapov boldy.

«Jyl kásipkeri» nomınatsııasy 1985 jyly negizi qalanǵan «Órnek» Sán úıiniń dırektory Nýrııash Nııazovaǵa berildi.

«Jyl qurmeti» atty nomınatsııasynyń laýreaty oblystyq otbasylyq úlgidegi balalar aýylynyń dırektory Mádı Tashov boldy. Mádı Qalashulynyń qyzmeti kezinde onshaqty bala JOO jáne arnaıy-ortasha oqý oryndarynyń túlekteri atandy. Ótken 2 jyl ishinde 11 bala qamqorlyq pen patronattyq tárbıege tapsyrylyp, 14 tárbıelenýshi óz úılerine qaıtqan.

«Jyl adamy» nomınatsııasynyń eń jas ıegeri Beıneý aýdanynyń J.Qaldyǵaraev atyndaǵy 8 «B» synyp oqýshysy Ǵalymjan Kúzembaev «Jyl erligi» nomınatsııasynyń laýreaty atandy. Jas batyr órt sóndirýshi brıgadasy kelgenshe, 3 balany aman-esen órtten alyp shyqqan.

«Úzdik áleýmettik joba» nomınatsııasyn «Oflaın jáne onlaın oqý ortalyǵy «Timur academy» oqý ortalyǵynyń dırektory Tımýr Bektur jeńip aldy.