Mańǵystaýda jyl basynan beri ekinshi úshem dúnıege keldi

AQTAÝ. QazAqparat – Mańǵystaý oblystyq perınataldyq ortalyǵynda Aıym, Gúlim jáne Nurym esimdi úshem dúnıege keldi, dep habarlaıdy QazAqparat tilshisi.

«Enem – egizdiń syńary. Degenmen, bizde úshem bolady dep oılamaǵan edik. Ózimiz de tań qaldyq. Tabıǵı jolmen, jasandy emes. Úshemderge deıin úsh balamyz bar. Dárigerlerdiń keńesimen kesar tiligi arqyly bosanýdy josparlap, ota sátti ótti. Perzenthana qyzmetkerlerine kóp rahmet aıtamyn», - dedi Amangúl Tasıbekova.

Bul – Aqtaýdaǵy «Ana men bala» ortalyǵynda jyl basynan beri dúnıege kelgen ekinshi úshem. Buǵan deıin 27 sáýir kúni alǵashqy úshem týǵan edi. Ol kezde de 2 qyz ben 1 ul dúnıege kelgen, bul joly da solaı.

«Ómirge kelgen bir ul men eki qyzdyń salmaǵy: 2 kg 286 g, 2 kg 280 g jáne 1 kg 880 g boldy. Sábılerge de, anasyna da qajetti kútim jasaldy. Bóbekter deni saý, elimizdiń qalaýly azamattary bolyp óssin», - deıdi ortalyq dırektory Japyraq Epenova.

Jalpy, bıyl oblystyq perzenthanada 4 319 náreste ómirge kelgen. Onyń 85-i egiz bolsa, ekeýi – úshem.