Mańǵystaýda jyl basynan beri 49 adam turmystyq zorlyq-zombylyq qurbany bolǵan
Óńirde turmystyq zorlyq-zombylyqqa ushyraǵandarǵa psıhologııalyq kómek kórsetetin bir ǵana daǵdarys ortalyǵy jumys isteıdi.
«Bizdiń ortalyqqa turmystyq zorlyq-zombylyq qurbandary túsedi. Kóbinese 30 ben 45 jas aralyǵyndaǵy kópbalaly analar. Biz olarǵa psıhologııalyq jáne quqyqtyq kómek kórsetemiz. Ortalyqta mundaı áıelder alty aıǵa deıin tura alady. Tamaǵy men qajetti kıim-keshekpen qamtamasyz etemiz. Sondaı analarǵa jumys tabýǵa kómektesemiz, balalardy balabaqshaǵa ornalastyramyz. Sondaı-aq ortalyq mamandary kúızeliske ushyraǵan, turmysta zorlyq kórgen balalarmen de jumys isteıdi», dedi daǵdarys ortalyǵynyń psıhology Dına Jumabaeva.
Psıhologtyń aıtýynsha, otbasyndaǵy zorlyq-zombylyqtyń qurbany bolatyndar - kóbine kúıeýine materıaldyq jáne emotsıonaldyq turǵydan táýeldi áıelder. Olar týǵan-týystyń aldynda bedeli túsip, bala-shaǵasyn asyraı almaı qalamyn ba, degen qorqynyshtan ózderin qurban etedi.
«5-6 jyldan beri joldasym jumys istemeıdi. Balalarymnyń kózinshe uryp-soǵady, balaǵattaıdy. Tózimim taýsyldy. Balalarym úshin shydadym. Joldasymnyń taǵy bir uryp-soǵýy kezinde polıtseılerdi shaqyrǵanbyz. Sonymen olar bizdi osynda alyp keldi. Áıelderge eshqashan óz quqyqtaryńdy aıaqqa taptamańdar degim keledi. Áıelder de baqytty bolǵysy keledi» dedi aqtaýlyq kelinshek Lıza.