Mańǵystaýda juqpaly aýrýlar aýrýhanasy oblystyq aýrýhanamen biriktirildi
AQTAÝ. QazAqparat - Mańǵystaý oblystyq aýrýhanasyna juqpaly aýrýlar aýrýhanasy qosyldy. Bul týraly atalǵan mekemeniń dırektory Bolatbek Qaıýpov jýrnalıstermen ótken brıfıngte málimdedi, dep habarlaıdy QazAqparat tilshisi.
Mundaı sheshimge juqpaly aýrýlar aýrýhanasynyń ótelmegen qaryzy sebep bolyp otyr. Oblys ákimi sondyqtan osyndaı qaýly qabyldaǵan. Óıtkeni qaryzy bar medıtsınalyq mekeme shyǵyndy óteı almaı otyr.
Aýrýhana dırektorynyń aıtýynsha, naýqastardy emdeýge óte kóp mólsherde shyǵyn jumsalady.
«Qan qysymy, júrek, qan tamyrlary aýrýymen aýyratyn naýqastardy emdeýge 50 myń teńge bólinedi. Jalpy ketken qarjy esh jerde kórsetilmeıdi. Sol sebepti shyǵyndy óteı almaı otyrmyz», - dedi Bolatbek Qaıýpov.
Qazir juqpaly aýrýlar aýrýhanasynda 60 tósek oryndy balalarǵa arnalǵan bólimshe bar. Eresekterge arnalǵan osyndaı bólimshe qyzmet etedi. Sondaı-aq, qyzmetkerler qysqartylmaǵan.
«Bizge tolyq qaǵaz júzindegi zańnamalyq qujattary bári bekitilgennen keıin bizdiń quramymyzǵa kirip otyr. Eshqandaıda jumystan shyǵarylǵan kadrlar bolǵan joq. Tolyq shtatpen bizge aýysyp otyr», - deıdi Mańǵystaý oblystyq aýrýhananyń dırektorynyń orynbasary Muhamedjan Nurǵazıev.
