Mańǵystaýda jolserikter ákimshilik jaýapkershilikke tartyldy

AQTAÝ. QazAqparat – Aqtaýda QR Sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti men óńirdiń Kóliktik baqylaý ınspektsııasy júrgizgen reıd barysynda birneshe jolserik ákimshilik jaýapkershilikke tartyldy, dep habarlaıdy QazAqparat tilshisi.

Departamenttiń málimetinshe, reıd «Almaty – Mańǵystaý», «Mańǵystaý – Almaty» jáne «Mańǵystaý – Atyraý» baǵytyndaǵy poıyzdarda ótkizildi. Nátıjesinde, bıletsiz 23 jolaýshy men 900 keli rásimdelmegen júk anyqtalǵan. Departament qyzmetkerleri jolserikterge qatysty 21 ákimshilik materıal toltyrdy.

«Bul jumystar odan ári jalǵastyrylady. Aldaǵy ýaqytta temirjol salasy qyzmetkerlerimen osyndaı shara uıymdastyramyz», - delingen habarlamada.