Mańǵystaýda jol sapasyn jaqsartýǵa bes jylda 56,5 mlrd teńge bólinedi
QR Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda osyndaı derek keltirdi.
«2025 jylǵa deıin óńirdi damytýdyń keshendi jospary sheńberinde uzyndyǵy 791 shaqyrymdyq jergilikti jol qaıta jańartylyp, óńirde oryndalǵan jumystar esebinen jergilikti mańyzy bar joldardyń normatıvtik jaı-kúıiniń kórsetkishi 100% jetedi. Atalǵan sharalarǵa 56,5 mlrd teńge bólý josparlanǵan», - dedi mınıstr.
Sondaı-aq, ol Memleket basshysynyń Aqtaý jáne Quryq porty negizinde konteınerlik hab qurý jáne Qytaıdan keletin júktiń bir bóligin tartý boıynsha tapsyrma bergenin eske saldy.
«Bul tapsyrma óńirdi damytýdyń keshendi josparyna engizilgen. Qazirgi ýaqytta konteınerler aǵynyn qurý, onyń ishinde konteınerlik termınal, vagondyq júkter men aýyl sharýashylyǵy ónimderin konteınerlerge «qaıta tıeý» jónindegi keshen salý, tıeý tehnıkasyn jańartý máselesin pysyqtap jatyrmyz. Jobany iske asyrý nátıjesinde 2025 jylǵa qaraı konteıner aǵynynyń 2,5 ese ósimi kózdelgen», - dedi vedomstvo basshysy.
