Mańǵystaýda jol apatynan júk kóliginiń júrgizýshisi qaza tapty

NUR-SULTAN. QazAqparat – Aldyn ala derek boıynsha, tirkemesi bar júk kóliginiń júrgizýshisi róldi basqara almaı, qatty jyldamdyqpen kelip, jartasqa soǵylǵan. Bul týraly Mańǵystaý oblystyq polıtsııa departamentiniń baspasóz qyzmeti málimdedi, dep habarlaıdy QazAqparat lada.kz saıtyna silteme jasap.

Qaıǵyly jol-kólik oqıǵasyn polıtsııa kapıtany Taıman Ańshybaev pen aǵa leıtenant Nurlan Qashtaev reıd júrgizý kezinde anyqtady.

Taıman Ańshybaev qozǵalmaı turǵan tirkemesi bar júk kóligi jartasqa soǵylyp, qısaıyp qalǵandyǵyn aıtady. Tirkemesine kartop tıelgen kóliktiń kabınasy qatty soqqynyń saldarynan myjylyp, júrgizýshi qysylyp qalǵan.

Taıman Ańshybaev oqıǵa ornyna birden tergeý-jedel tobyn shaqyrǵan.

Belgili bolǵandaı, qaıǵyly jol apaty tamyzdyń 1-nen 2-ne qaraǵan túni Shetpe men Beıneý aýyldarynyń arasynda, Mań ata ótkeliniń qaýipti aımaǵynda bolǵan.

Qaza tapqan azamattyń osy kólik quralynyń júrgizýshisi ekeni anyqtaldy. Ol Jambyl oblysynyń týmasy.

Jol-kólik oqıǵasynyń mán-jaıy anyqtalyp jatyr.