Mańǵystaýda jol apatynan qaza bolǵan balalardyń sany 66% artqan
«Jol-kólik oqıǵalarynyń aýyr saldaryn azaıtý basty maqsattardyń biri bolǵandyqtan, bul baǵyttaǵy is-sharalar júıeli túrde ótkizilip otyrdy. Nátıjesinde, jyl basynan beri 116 638 quqyqbuzýshylyq anyqtalyp, aıyppul salyndy. Sondaı-aq, oblys kóleminde jol-kólik oqıǵalarynyń sany byltyrmen salystyrǵanda - 6,7%, jaraqattanǵandar - 19 % tómendegen. Al, qaza bolǵandar sany 34,7% ósip otyr. Sonymen qatar, balalardyń qatysýymen tirkelgen jol-kólik oqıǵalarynyń sany - 13,3%, qaza tapqandar sany - 66,7% ósti», - dedi Bolatbek Aqshaýov.
Oblystyq polıtsııa departamenti qoǵamdyq jáne jol qaýipsizdigin qamtamasyz etý maqsatynda respýblıkalyq, oblystyq deńgeıde 17-ge jýyq jedel-profılaktıkalyq is-shara ótkizgen.
«Sońǵy kezde jol apatynan azamattarymyzdyń, búldirshinderimizdiń qazasy kóbeıýi bárimizdiń janymyzdy aýyrtyp otyr. Jol apaty júrgizýshilerdiń belgilengen jyldamdyqty shamadan tys asyrýynan, júrgizýshilerdiń kólik quralyn basqarý kezinde uıyqtap ketý saldarynan jáne jaıaý júrginshilerdiń belgilenbegen jerde joldy kesip ótýinen, sonymen qatar, júrgizýshilerdiń jaıaý júrginshilerdi ótkizbeýiniń kesirinen bolyp jatyr. Osyǵan oraı, oblys turǵyndary men qonaqtaryn jol erejesin saqtap, zań tártibine baǵynyp, qaýiptiń aldyn alýǵa shaqyramyn», - dedi Bolatbek Aqshaýov.
Búginde jol-kólik oqıǵalarynyń aldyn alý úshin 21 «Kıber sherıf» jyldamdyq ólshegish qurylǵysy iske qosylyp, onyń 14-i respýblıkalyq tasjolda, úsheýi Aqtaý qalasynda, al ekeýi Jańaózen men Munaılyda jumys jasap tur.
Sonymen qatar, jol-kólik oqıǵalarynyń aldyn alý maqsatynda «SKAT-P» kópfýnktsııaly jyldamdyq ólsheý quraldarynyń 8-i jol-kólik oqıǵalary jıi bolatyn respýblıkalyq mańyzdaǵy tasjoldardyń baǵytyna qoıylǵan.
