Mańǵystaýda jol apatynan bes adam zardap shekti
AQTAÝ. QazAqparat - Mańǵystaý oblysynda jeńil jáne júk kólikteri soqtyǵysyp, saldarynan 5 adam zardap shekti, dep habarlaıdy QazAqparat Lada.kz saıtyna silteme jasap.
«Jol apaty 2 aqpan kúni saǵat 14.10 shamasynda Jetibaıdan 20 shaqyrym jerde boldy. Saldarynan jeńil kólikte bolǵan jolaýshylar - úsh áıel, sábı jáne er adam zardap shekti. 1993 jyly týǵan júkti áıeldi dárigerler qarady. Ózine nemese onyń ishtegi nárestesine qaýip týdyratyn belgiler anyqtalmady. Jeti aılyq balanyń anasynda «moıyn omyrtqasynyń sińiri sozylǵan». Kólik ekinshi qaıtara aýdarylǵanda ol qolyndaǵy balasyna ıe bola almaı qalyp, búldirshinniń bas terisi sydyrylǵan. Onyń kúıeýi ambýlatorlyq em-dom qabyldaıtyn bolady. Zardap shekken áıel men bala dárigerlerdiń baqylaýynda», - dep habarlady Jetibaı aýyldyq aýrýhanasynyń dırektory Amantaı Dosjanov.
Onyń aqparatynsha, kólikte bolǵan taǵy bir jolaýshy - 1973 jyly týǵan áıel aýrýhanaǵa jatqyzyldy. Oǵan qoıylyp otyrǵan dıagnoz: jabyq bas súıek-mı jaraqaty, mıdyń shaıqalýy, mańdaı-sheke aımaǵynyń soǵylǵan jaraqaty, qol jaraqattary.
Jol apatyna túskenderdiń aıtýynsha, júk kóligi jeńil mashına kele jatqan jolaqqa aýysyp, apatty jasaǵan. Jeńil mashına aýdarylǵan. Eki júrgizýshi de zardap shekpegen, aýrýhanaǵa júgingen joq.
