Mańǵystaýda jol apatynan 2 jolaýshy jaraqat alyp, bir adam kóz jumdy
Jol-kólik oqıǵasy búgin tańǵy saǵat 8:30 shamasynda Munaıly aýdany Qyzyltóbe aýylynda bolǵan. «Shoǵy» meıramhanasyna jaqyn mańda ornalasqan «Barys» gaz quıý beketi jolynda qos kólik soǵysyp qalǵan.
Oblystyq densaýlyq saqtaý basqarmasy baspasóz qyzmetiniń habarlaýynsha, «103» qyzmetine shaqyrtý saǵat 8:34-te túsken.
«Jedel járdem brıgadasy oqıǵa ornyna jedel jetip, alǵashqy medıtsınalyq kómek kórsetildi. Belgili bolǵandaı, 1957 jyly týǵan er adam men 1997 jyly dúnıege kelgen jas jigittiń bas súıegine zaqym kelgen jáne mıy shaıqalǵan. Ekeýide Mańǵystaý oblystyq aýrýhanasynyń travmatologııa bólimshesine jetkizilgen» delingen habarlamada.
Al úshinshi adamnyń aty-jóni belgisiz, jas shamasy 25-30-da. Ol oqıǵa ornynda kóz jumdy. Marqumnyń kim ekenin tártip saqshylary anyqtaıdy.