Mańǵystaýda joǵary qysymdy gaz qubyry iske qosyldy

AQTAÝ. QazAqparat – Mańǵystaýda joǵary qysymdy gaz qubyry iske qosyldy. Ol Quryq aýylyn «Sarsha» jerimen, sondaı-aq Aqtaý qalasynyń mańyndaǵy «Jyly jaǵajaı» kýrorttyq aımaǵymen baılanystyrady, dep habarlaıdy QazAqparat tilshisi.

Qubyr jelisi kýrorttyq aımaqtaǵy óndiristik, kýrorttyq nysandardardy da gazdandyrýǵa múmkindik beredi. Sondaı-aq jyl saıyn óńirge saparlap kelgen týrıster sanynyń artýyna, sý tapshylyǵy máselesin sheshýge, Aqtaý qalasyna gazdyń qosymsha kólemin ulǵaıtýǵa, aýyl sharýashylyǵynyń damýyna septigin tıgizbek.

«Memleket basshysynyń tapsyrmasyna sáıkes gaz qubyry iske qosyldy. Bul rette gaz qubyrynyń iske qosylýy shaǵyn jáne orta bıznestiń, onyń ishinde gazdy óz qajettilikteri úshin paıdalanatyn ónerkásiptik, kommýnaldyq-turmystyq sektordyń ósýin yntalandyrady. Sonymen qatar, jobany iske asyrý jańa jumys oryndaryn ashady. Bul óńirdegi jumyssyzdyq deńgeıin tómendetýge múmkindik beredi. Joba óńirdiń jáne tutastaı alǵanda eldiń ekonomıkasyna oń áserin tıgizedi dep senemiz», - dedi Mańǵystaý oblysy ákiminiń orynbasary dedi Qanat Quljanov.

Bul jobany «QazaqGaz» UK» AQ enshiles uıymy – «QazTransGaz Aımaq» AQ júzege asyrdy.

«Jalpy «QazaqGaz» óz esebinen Mańǵystaý oblysynda quny 260 mlrd teńgeden astam somany quraıtyn birneshe ınvestıtsııalyq jobany júzege asyryp jatyr. Aıta ketý kerek, 2022 jyly 85 shaqyrymdyq gaz jelisi men ótkizý qabileti saǵatyna 80 myń tekshe metrdi quraıtyn 1 avtomatty gaz taratý stantsııasy salynǵan bolatyn», - dedi «QazaqGaz» UK» AQ Basqarma tóraǵasynyń orynbasary Aqbar Tólegenov.