Mańǵystaýda jerden 100-200 metr tómendegen Jyǵylǵan degen oryn bar
ALMATY. QazAqparat - Búgin Almatyda týrısterge arnalǵan «Ústirt qupııasy» jol nusqaǵyshtyń tusaýy kesildi, dep habarlaıdy QazAqparat tilshisi.
Aqparattyq býklet Mańǵystaý túbegine jasalǵan iri ekspedıtsııanyń jumysynyń nátıjesinde jasaldy.
247 adam 69 jol tolǵamaıtyn kólikpen 1200 astam shaqyrym jerdi júrip ótip, qupııaǵa toly Mańǵystaý túbegin aralap shyqqan.
«Mańǵystaý túbegi qupııaǵa toly jer. Munda 11 myńnan astam tarıhı tabıǵı keremet eskertkishter bar. Olardyń keıbirin jergilikti turǵyndar kórmegen. Olardyń biri Jyǵylǵan degen jer. Ol jerden 100-200 metrdeı tómendep ketken. Osy jerlerdiń bárine týrısterge jol saldyq», - dedi Nomad Explorer komandasynyń jetekshisi Marǵulan Seısenbaev.
Onyń aıtýynsha, 34 adam qaýipsizdik, ákimshilik boıynsha kómekshi bolsa, qalǵan 220 adam týrıst retinde qatysty.
Osy sapardyń nátıjesinde «Ústirt qupııasy» jol nusqaǵyshy tanystyryldy.
Bul kitap Akademık Shahmardan Esenov atyndaǵy ǵylymı-bilim berý qorynyń qoldaýymen basyldy. Jol nusqaǵysh 1200 taralymmen naýryz aıynda Almaty men Aqtaýda satylymǵa shyǵady.
«Ótken kóktemde Mańǵystaý túbegine jasalǵan ekspedıtsııa boıynsha jol nusqaǵyshty jasaý týraly usynys tústi. Shahmardan Esenov sol Mańǵystaý túbeginde paıdaly ken qazbalaryn ashqan bolatyn. Sondyqtan, bul usynysty qabyl aldyq. Bul aqparattyq kitapsha qazaqstandyqtardy qasıetti jerlerge jıi saıahattaýǵa septigin tıgizedi dep úmittenemiz», - dedi atalǵan qordyń ókili Aıǵanym Malısheva.
Aqparattyq kitapshada týrısterdiń toqtaıtyn koordınattary, avtoturaq oryndary, jaqyn mańdaǵy nysandar týraly málimetter bar.
Aıta ketý kerek, Nomad Explorer bıyl Altaı taýyna ekspedıtsııaǵa shyqpaq. Sonymen qatar, bıyl Dıskaverı jobasy aıasynda Mońǵolııa jerine saıahat belgilengen.
