Mańǵystaýda jer qoınaýyn paıdalanýshylar eki sý tuşytý zaýytyn salady
ASTANA. QazAqparat - Munaı kompanııalarynyń qarajaty esebinen Kendirli demalys aýmaǵynda, sondaı-aq Qarajanbas ken ornynda sý tuşytý zaýyty salynady, dep habarlady Aqtaý jańalyqtary.
Osy aptada oblys ákimi Eraly Toǵjanovtyń jáne «QazMunaıGaz» UK» AQ basqarma tóraǵasy Saýat Myńbaevtyń qatysýymen munaı-gaz óndirý salasy máseleleri boıynsha májilis ótedi.
Kezdesý barysynda «QazMunaıGaz» UK» AQ enshiles jáne táýelsiz uıymdarynyń aǵymdaǵy jaǵdaıy, eńbek naryǵyn transformatsııalaý máseleleri, jalaqyny ındeksteý, keı munaı-servıstik kompanııalar jumysyn kólemmen qamtamasyz etý máseleleri talqylanady. Jumystyń taǵy bir mańyzdy baǵyty Qarajanbas ken ornyn tuşy sýmen qamtamasyz etetin zaýyt salý.
«Munaı kompanııalarynyń Kendirli demalys aýmaǵynda magıstraldyq qubyr ótkizgishpen teńiz sýyn tuşytatyn zaýyt, sondaı-aq Qarajanbas ken ornynda sýdy tuşytý zaýytyn salýynyń mańyzy zor. Atalmysh jobalar osy jyly 3-4 sáýirde Memleket basshysy Mańǵystaý oblysyna kelgende bergen tapsyrmalaryn oryndaý boıynsha jol kartasyna engizildi. Aýyzsýmen qamtamasyz etilý máselesi oblys kásiporyndarynyń qalypty jumys isteýin, azamattardyń tynys-tirshiligin qamtamasyz etý úshin barynsha ózekti máselelerdiń biri bolyp tabylady», - dep atap ótti oblys ákimi.
«Oblys aýdandarynyń sýǵa suranysynyń joǵary ekenin eskerip, Jańaózende de sý tuşytý zaýytyn salý qajettiligi týyndaýda. Barlyq másele talqylandy. Aldaǵy ýaqytta jumysty bastaımyz», - dedi basqarma tóraǵasy Saýat Myńbaev.
