Mańǵystaýda jer qatynastary zańyn buzǵandarǵa 27 mln teńgeden astap aıyppul salyndy

AQTAÝ. QazAqparat - Mańǵystaýda jer qatynastary salasyndaǵy zańnama talaptaryn buzǵandarǵa 27 mln teńgeden astap aıyppul salyndy. Bul týraly Mańǵystaý oblysy qala qurylysy jáne jerdi baqylaý basqarmasynyń basshysy Temirbek Asaýov málim etti, dep habarlaıdy QazAqparat.

«Jyl basynan beri Mańǵystaý oblysynda jer qatynastary zańy talaptarynyń oryndalýy boıynsha 44 tekseris jumysy júrgizildi. Nátıjesinde óńirdegi jeke jáne zańdy tulǵalarǵa barlyǵy 27 521 895 teńge kóleminde aıyppul salyndy. Byltyr bul kórsetkish 25 099 230 teńgeni qurady», - dedi Temirbek Asaýov.

Sondaı-aq, tekseris barysynda Mańǵystaý oblysy aýmaǵynda kásipkerlik úshin berilip, tıisti maqsatta ıgerilmegen jer telimderi anyqtalǵan. Nátıjesinde qoldanylmaı qalǵan 69,6318 gektar jer ýchaskesi belgili boldy. Osy jerlerdi ıelengen 43 azamatqa zań buzýshylyqty joıý jóninde nusqama berildi.

«Jalpy oblys boıynsha úı-jaılardy zańsyz qaıta jabdyqtaý jáne qaıta josparlaý boıynsha 11 is, zańsyz qurylys boıynsha 2 is, rekonstrýktsııalaý, restavratsııalaý boıynsha 18 is, ýaqytynda habarlama jibermeı kásipkerlik nemese ózge de qyzmetpen aınalysý boıynsha 15 is jáne t. b. zańbuzýshylyqtar anyqtalyp, is qozǵalǵan», - dedi Temirbek Asaýov.