Mańǵystaýda jazǵy demalys kezinde 252 saýyqtyrý lageri jumys isteıdi

AQTAÝ. QazAqparat - Mańǵystaý oblysynda balalardyń jazǵy demalysyn uıymdastyrý úshin 252 saýyqtyrý orny ashylady dep josparlanyp otyr. Áleýmettik osal toptaǵy otbasy balalary birinshi kezekte qamtylmaq, dep habarlaıdy QazAqparat.

Bul týraly qoǵamdyq kommýnıkatsııa ortalyǵynda ótken brıfıngte Mańǵystaý oblystyq bilim basqarmasy basshysynyń orynbasary Aıjaqsy Turjanova habarlady.

Spıkerdiń aıtýynsha, oblys boıynsha 143 mektepte bilim alatyn 155127 oqýshynyń 91,2% jazǵy saýyqtyrýmen qamtý josparlanyp otyr.

- Oblys boıynsha jazǵy kanıkýl kezinde balalardyń jazǵy demalysy 2 baǵytta uıymdastyrylady. Olar - jazǵy saýyqtyrý (7-13 jas) jáne balalardyń bos ýaqytyn tıimdi paıdalaný, ıaǵnı eńbekpen, tanymdyq shyǵarmashylyq, sporttyq, týrıstik sharalarmen qamtý jumystary (7-18 jas). Balalardyń jazǵy demalysyn uıymdastyrý úshin 252 saýyqtyrý orny jumys jasaıdy dep josparlanǵan. Onyń ishinde qala syrtynda 4 lager, mektep janynan tamaqtandyratyn 86 lager, mektep janyndaǵy 85 kásiptik jáne 77 shatyrly lager bar. Jalpy jazǵy saýyqtyrýǵa áleýmettik osal toptaǵy otbasy balalary birinshi kezekte tartylady (27 629 bala). Jazǵy mezgilde balalardyń qaýipsizdigin qamtamasyz etý úshin «Bala qorǵaý» telegram-chaty jáne 111, 607515 senim telefondary táýlik boıy jumys isteıdi, - dedi Aıjaqsy Turjanova.

Sonymen qatar, 2017 jyldan bastalǵan «Jas sarbaz» áskerı-patrıottyq baǵyttaǵy lagerde 8-10 synyptyń 300-ge jýyq oqýshysy demalyp, kásibı baǵdar alady.

Jazǵy demalystyń ekinshi baǵyty boıynsha 121886 (78,5%) oqýshy jazǵy demalys kezinde eńbek, tanymdyq shyǵarmashylyq, sporttyq, týrıstik sharalarmen qamtylady.

Bul rette «Jasyl el» baǵdarlamasy, aýla klýbtary, týrıstik-ólketaný baǵytyndaǵy joryqtar, tildik mektepter, debattyq jáne áskerı-patrıottyq klýbtar jumys jasaıdy.

Al, qala syrtynda 3 lager bar. Olar - «Baldáýren», «Flamıngo» jáne «Alaý».