Mańǵystaýda jazasyn óteýshiler 40 myń dana vırýstan qorǵanysh kostıýmin tikti

AQTAÝ. QazAqparat - Mańǵystaýda 32 jazasyn óteýshi 40 myń dana vırýstan qorǵaıtyn kostıým tikken. Bul týraly QR ІІM Qylmystyq-atqarý júıesi komıteti Mańǵystaý oblysy boıynsha departamentiniń baspasóz hatshasy Roman Telenkov málim etti, dep habarlaıdy QazAqparat tilshisi.

Medıtsına qyzmetkerlerine arnalǵan qorǵanysh kostıýmderdi tigýmen 32 jazasyn óteýshi aınalysady. Osy maqsatta GM 172/6 túzeý mekemesinde shaǵyn tseh qurylǵan. Qoldan pishilgen kostıýmderdiń sapasy sanıtarlyq talaptarǵa sáıkes.

«Vırýstyq ınfektsııadan qorǵaný kostıýmderin qaýipsizdigi barynsha joǵary túzeý mekemesinde jazasyn óteýshiler Mańǵystaý óńirinde karantın rejımi jarııalanǵanǵa deıin tige bastaǵan bolatyn. Búginde 32 sottalýshy jumys kestesine saı táýligine birneshe kostıým piship shyǵarýda. Olar zań júzinde turaqty qyzmetke tartylǵan. Eńbegi úshin aıyna 42 500 teńge kóleminde jalaqy alady», - deıdi Roman Telenkov.

Aqtaýda shyǵarylǵan bul kıimder birinshi kezekte jergilikti densaýlyq saqtaý mekemeleriniń qyzmetkerleri úshin jeke qorǵanysh quraly esebinde satyp alynýda. Bir kostıýmniń naryqtaǵy quny 1 500 teńgege baǵalanǵan. Sondaı-aq oblystaǵy basqa da kásiporyndardan álgi kostıýmderge kóptep tapsyrys túsip jatqan kórinedi.

Bastysy, temir tordyń artynda otyrǵandar jumys istep, suranysy joǵary ónim shyǵarýda. Olar koronavırýspen kúreske óz úlesin osylaısha qosyp júr.