Mańǵystaýda jas balalardy azǵyrǵan 69 jastaǵy zeınetker sottaldy
AQTAÝ. QazAqparat - Aqtaý qalasyndaǵy Mańǵystaý oblystyq kámelettik jasqa tolmaǵandar isi jónindegi mamandandyrylǵan aýdanaralyq sotynda (ıývenaldyq sot) 1948 jyly dúnıege kelgen Shetpedegi mektep avtobýsynyń júrgizýshisine qatysty úkim shyqty.
Oǵan jalpy rejimdegi kolonııada 5 jylǵa bas bostandyǵynan aıyrý jazasy taǵaıyndaldy, dep habarlaıdy «QazAqparat» HAA tilshisi.
Іs jabyq túrde qaraldy, otyrysqa jýrnalısterdiń kirýine ruqsat etilmedi.
«Sottalýshy QR QK-niń 124-baby 1-bólimi («jas bala ekenin kórineý bile tura oǵan kúsh qoldanbaı, azǵyndyq áreketter jasaý») boıynsha aıypty dep tanyldy. Oǵan 8 jylǵa deıin belgili bir qyzmetterdi (balalardyń tárbıesine jáne oqytýǵa qatysty) atqarýǵa tyıym salynyp, jalpy rejimdegi kolonııada 5 jyl jazasyn óteý úkim etildi», - dep habarlady Mańǵystaý oblystyq soty baspasóz qyzmetiniń basshysy Gaýhar Nurhanova.
Sotqa kýágerler retinde qyzdyń synyptastary qatysty. Zeınetker qyzdyń qolyn jáne aıaqtaryn súıip, denesin ustaǵany belgili boldy. Qorlyq jasalmaǵan.
Sottalýshy zardap shegýshi qyzǵa moraldyq zalal retinde 500 myń teńge kóleminde ótemaqy tóleıdi.
