Mańǵystaýda jarylǵysh zat qoıyldy dep jalǵan aqparat taratqan 5 oqıǵa tirkeldi
AQTAÝ. QazAqparat - Sońǵy 2 jylda Mańǵystaý oblysynda jarylǵysh zat qoıylǵany týraly jalǵan aqparat taratý boıynsha 5 fakti tirkelgen, dep xabarlaıdy QazAqparat tilshisi.
Polıtsııa departamenti baspasóz qyzmetiniń xabarlaýynsha, 2018 jyly 2 derek tirkelgen. Jalǵan aqparat taratqandar ustalyp, QR Qylmystyq Kodeksiniń 273-baby boıynsha jaýapqa tartylǵan.
Osyǵan oraı, quzyrly organ ókilderi qoǵamdyq tynyshtyq pen qaýipsizdikti saqtaý maqsatynda turǵyndardan jalǵan aqparat taratpaýdy suraıdy.
Terrorlyq sıpattaǵy jalǵan aqparat taratqandar ustalǵan jaǵdaıda 6 jylǵa deıin bas bostandyǵynan aıyrylýy múmkin. Jaza 14 jastan bastap qoldanylady. Eger kámelet jasyna tolmaǵan bala taratqan bolsa, barlyq jaýapkershilikke ata-anasy tartylady.
Mańǵystaý oblystyq polıtsııa departamentiniń málimetinshe, 2016-2018 jyldar aralyǵynda kelip túsken 339 anonımdi xabarlamany tekserý úshin memlekettik bıýdjetten 43,3 mln teńge bólingen.
