Mańǵystaýda jańbyr arty selge ulasyp, kólikterdi aǵyzyp áketti

FORT-ShEVChENKO. QazAqparat - Túpqaraǵan aýdanynyń ortalyǵy Fort-Shevchenko qalasynan 68 shaqyrymdaǵy «Kógildir aılaq» teńiziniń jaǵalaýynda demalyp jatqan adamdar men olardyń avtokólikteri nóser jaýynnan paıda bolǵan seldiń astynda qalyp qoıdy. Bul týraly Túpqaraǵan aýdany ákimdigi málim etti, dep habarlaıdy QazAqparat tilshisi.

«24 shildede saǵat 08:28-de Fort-Shevchenko qalasynyń órt sóndirý bólimine «Kógildir aılaqtaǵy» demalýshylardan qońyraý kelip tústi. Demalys ornyna kireberiste sel paıda bolyp, avtokólikterdiń aǵyp ketkendigi týraly shaqyrtý aldyq. Shaqyrý túskennen soń Aqtaý qalalyq №2 mamandandyrylǵan órt sóndirý bóliminen vahtalyq avtokóligi shyǵyp, oqıǵa ornyna baryp 10 adamdy evakýatsııalady. Olardyń ekeýi - bala», - dedi Túpqaraǵan aýdandyq Tótenshe jaǵdaılar bóliminiń bastyǵy Joldybek Bısenbekov.
Qarǵyn sýdan 6 avtokólik shyǵarylǵan. Evakýatsıalaý jumystaryna S.Shapaǵatov aýyldyq okrýgynan da arnaıy tehnıkalar jumyldyrylǵan.
Aıta keteıik, 23 shildede Mańǵystaý oblysynda nóser jaýyn jaýǵan edi.

Zardap shekkender joq.