Mańǵystaýda jańa sý qubyry 10 myńnan astamdy aýyzsýmen qamtamasyz etedi
AQTAÝ. QazAqparat - Fort-Shevchenko qalasynyń jańa shaǵyn aýdanyna jáne oblystyń Baýtıno aýylyna sý qubyryn tartý jumystary bastalǵan eki aıda 13 myń metr qubyr ornatylyp úlgerdi, dep habarlady «QazAqparat» HAA tilshisi.
«Aǵymdaǵy jylǵy mamyrda «Fort-Shevchenko qalasyna jáne Baýtıno kentine sý qubyryn tartý» jobasy boıynsha qurylys montajdaý jumystary bastaldy. Búginde dıametri 32 mm 12 myń 700 metr sý qubyry ornatyldy. Magıstraldyq qubyrlardy tóseý úshin 3 shaqyrym transheıa qazyldy.
Jobany iske asyrý kezeńi 2017-18 jyldar, jobanyń jalpy quny - 1 mlrd 450 myń teńge, joba «Nurly jol» membaǵdarlamasy aıasynda oryndaldy», - dedi oblystyń energetıka jáne TKSh basqarmasynyń basshysy Sapar Amanbekov.
Sý qubyrynyń uzyndyǵy 61,811 shaqyrym. 10 myń 200 adam sapaly taza sýmen qamtamasyz etildi. Sondaı-aq ol ótken jyly Ulttyq qordan Munaıly aýdany Mańǵystaý aýylyna avtonomııalyq qazandyq salýǵa qarajat bólingenin aıtty.
Qazirgi ýaqytta qurylys aıaqtaldy. Bólingen qarajat tolyqtaı ıgerildi. Mańǵystaý aýylynyń kóp qabatty úıleri men áleýmettik nysandarynyń mańyna 10 avtonomııalyq qazandyq ornatyldy. Nysan jylý maýsymy bastalǵanda paıdalanýǵa beriledi dep josparlanýda. «Jobany iske asyrý nátıjesinde energoresýrstar únemdelip, turǵyndar men áleýmettik nysandar sapaly, únemdi jylýmen qamtamasyz etiletin bolady», - dep atap ótti Sapar Amanbekov.
