Mańǵystaýda jalǵyz áıel ákim 50 jyldyq tarıhy bar aýyldy basqarady
57 aýyl ákiminiń biri - Laýra Ryspaeva. Ol 3 jyl boıy óz jumysyn qaltqysyz atqaryp keledi.
Ózi basshylyq etetin Shebir aýylynyń týmasy. Joǵary oqý ornyn bitirgen soń, týǵan aýylyna oralǵan. Eńbek jolyn aldymen Tuşyqudyq selo ákimi apparatynda, odan soń Shebir aýyly ákiminiń apparatynda qarapaıym maman retinde bastap, qyzmet satysymen órlegen. Ýaqyt óte Laýra Shebir aýyldyq okrýgi ákiminiń mindetin atqarýshy bolyp, al 2020 jyldyń sáýir aıynda Shebir aýyldyq okrýgi ákimi qyzmetine taǵaıyndalǵan.
«Memlekettik qyzmet áıel adam úshin aýyrtpalyǵy mol sala deýge bolady. Desek te jaýapkershiligi zor laýazymdy atqaryp otyrǵan soń ózime artylǵan senimdi aqtaýǵa tyrysamyn. Sondyqtan da, aýyl men eldiń jaıyn baqylaýda ustap, turǵyndarmen jıi kezdesemin. Ózim osy jerde týyp, óskennen keıin aýyl azamattarymen birlesip, keńesip, qyzmet etip jatyrmyn», - deıdi Laýra Ryspaeva.
Turǵyndardyń aıtýynsha, Laýra ákim bolǵan úsh jylǵa jýyq ýaqyt ishinde birqatar másele oń sheshimin tapqan. Mektep, balabaqsha jáne ambýlatorııa jóndeýden ótken. Osy jyldyń sońynda mádenıet úıin jóndeý jumystary josparlanǵan. Qazir jobalyq-smetalyq qujattamasy jasaqtalyp jatyr. Sondaı-aq aýylishilik joldarǵa 3,8 shaqyrym asfalt tóselgen. Bıyl taǵy 1,8 shaqyrym jol tóseý josparlanǵan. Aýyldyq okrýg turǵyndarynda sapaly 3G jáne 4G ınternet bar.
Laýra Ryspaeva basqaratyn Shebir aýylyna bıyl 50 jyl tolady. Aýdan ortalyǵy-Shetpe aýylynan soltústikke qaraı 73 shaqyrym jerde, Qyzylqum qumdy alqabynan shyǵysqa qaraı shóldi beldeýde ornalasqan aýylda búginde 1352 adam turady. Munda aýyldan shyqqan jastar «Dıplommen aýylǵa» jobasy boıynsha, týǵan ólkesine qaıta oralyp, jumys isteıdi.
Bıyl aýyl ákimi Laýra Ryspaeva jalpy abattandyrý, kóshelerdi jaryqtandyrý, okrýg aýyldaryndaǵy joldardy aǵymdaǵy jóndeý jumystaryn jalǵastyrýdy kózdep otyr. Jalǵyzilikti qarttarǵa, múgedekterge, kópbalaly otbasylarǵa jáne basqalarǵa kómek kórsetý boıynsha aýqymdy jobalardy júzege asyrý josparlanǵan.
