Mańǵystaýda jabaıy úırekterdi sýǵa batyrǵandar tabyldy

AQTAÝ. QazAqparat - Mańǵystaý oblysynyń polıtsııa qyzmetkerleri Kaspııde jabaıy úırekterdi sýǵa batyrǵan balyqshylardyń jeke basyn anyqtady, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, jastar Túpqaraǵan aýdandyq polıtsııa bólimine jetkizildi.

«Qazirgi ýaqytta tergeýshiler olarmen jumys istep jatyr.

Atalǵan fakti sotqa deıingi tergep-tekserýdiń biryńǵaı tiziliminde tirkeldi (janýarlarǵa qatygezdikpen qaraý). Osy bapqa sáıkes 500 AEK-ke deıin aıyppul salý nemese sol mólsherde túzetý jumystaryna tartý qarastyrylǵan», delingen habarlamada.

Buǵan deıin Ekologııa mınıstrligi Kaspıı teńizindegi jabaıy úırekterge qatysty jaǵdaıdy túsindirgenin jazǵan bolatynbyz.