Mańǵystaýda zańsyz berilgen jer telimderi qaıtaryla ma
AQTAÝ. QazAqparat - 2015-2017 jyldary Túpqaraǵan aýdanynda 202, Mańǵystaýda 38, Jańaózende 42, Munaıly aýdanynda 12 jer telimi zańsyz berilgen. Endi bul jerler birtindep qaıtarylyp jatyr. Degenmen, sharýashylyq maqsatta jer alǵan kásipkerler bul sheshimge qarsy bolyp otyr, dep habarlaıdy QazAqparat tilshisi.
Mańǵystaý oblysynyń kásipkerler palatasyna jergilikti atqarýshy organ mamandarynyń jibergen qatelikteri kesirinen berilgen jerge qatysty daýǵa baılanysty aryzdar tolastar emes.
Qatelik dep otyrǵanymyz: Ákimdiktiń jaýapty qyzmetkerleri jerge aýktsıon men konkýrs jarııalaǵany týraly málimetti jergilikti BAQ-qa ǵana basyp, al ınternet resýrstaryna shyǵarýdy eskermegen. Osylaısha zań talaptary buzylǵany anyqtaldy. Konkýrs aıaqtalǵannan soń jer kásipkerlerge bólinip berildi. Qazir onyń basym kópshiligine ǵımarattar salynyp, mal sharýashylyǵy qolǵa alynǵan. Іskerler birneshe adamdy jumyspen qamtyp, memleketke tıisti salyǵyn tólep otyr.
Sońǵy sot otyrystarynyń sheshimimen Mańǵystaý aýdanynyń 38 jer teliminiń 25-i kásipkerler paıdasyna sheshildi. Qalǵany áli tek sot qaraýynda. Keıbiriniń jer ýchaskesin keri qaıtyp alý týraly sheshim shyqqan. Mundaı sharalarǵa kásipkerler alańdaýly. Qazirdiń ózinde oblys boıynsha 300-ge jýyq jer ýchaskesiniń taǵdyry sot quzyretinde.
«41 jyl óndiriste jumys istep, ótken jyly mal sharýashylyǵyna aýystym. 2017 jyly konkýrsqa qatysyp, 300 gektar jerimdi aldym. Barlyq qujatyn rásimdedim. Maldarymdy satyp alyp, sharýashylyq júrgizip otyrmyn. Osy daý shyqqan soń qurylys jaǵyn toqtatyp otyrmyn. Bul jaǵdaıda halyqtyń kinási joq. Sońǵy 2 aıda ábden ábigerge tústik. Tez arada oń sheshimin tapsa deımiz. Ákimdik pen qatelik jibergen qyzmetkerlerdi sotqa tartý kerek. Bizdiń tarapymyzdan qujattardan eshqandaı kinárat joq. Bizdi nege sotqa súıreıdi? Halyqtyń jaǵdaıyn oılap, endigi isterdi sotqa jetkizbeı sheship, kásibimizdi damytýǵa múmkindik berseńizder. Bizdiń tilegimiz de, usynysymyz da osy. Medıatsııa jolymen sheship berseńizder deımin», - deıdi Munaıly aýdanynyń turǵyny Mádı Qojantaı.
MO prokýratýrasynyń qoǵamdyq múddelerdi qorǵaý basqarmasynyń prokýrory Faızýlla Jańabaevtyń aıtýynsha, 2017 jyly prokýratýra organdarynyń tekserisi azaıǵan ýaqytta, zańbuzýshylyqtar kóbeıip ketken.
«2018 jyly Elbasynyń tapsyrmasy boıynsha prokýrorlar jer qatynastaryndaǵy qadaǵalaýdy kúsheıtken bolatyn. Ásirese, Túpqaraǵan aýdanynda jer telimderi aýktsıonsyz jappaı berilgen. Qazir tergeý júrip, ister sotta qaralýda. Qylmystyq ister de qozǵaldy. Kásipkerlerdiń barlyq jaǵdaıyn pyshaqpen keskendeı aıta almaımyn. Árqaısysyn jeke qaraý qajet. Aýdan prokýrorlarynyń aıtýynsha, kóp jaǵdaıda ıgerilmegen jerler ǵana kórsetilgen. Tergeý kórsetkendeı, keıbir konkýrs bir kún buryn ǵana jarııalanyp, kelesi kúni berilgen. ıAǵnı, belgili bir adamnyń múddesi úshin jasalǵan. Munyń astarynda sybaılas jemqorlyqpen baılanysty sharalar bolýy múmkin dep sanaımyz. Qarapaıym halyq habarlamany kórip úlgermeıdi ǵoı. Zań boıynsha bir aı buryn ótkizilýi tıis. Qazir Túpqaraǵan men Munaıly aýdandary boıynsha qylmystyq ister bastaldy. Budan ári ár jaǵdaı boıynsha qarastyra bastaımyz», - dedi ol.
Al, MO Kásipkerler palatasy dırektorynyń orynbasary Ámirǵalı Janaev «Atameken» QR UKP jáne QR kásipkerler quqyǵyn qorǵaıtyn Prezıdent ýákili atynan Mańǵystaý oblysynyń ákimi Eraly Toǵjanovtyń atyna hat joldandy. Onda osy másele tolyq túsindirilgen».
Óńirlik kásipkerler palatasy arnaıy hat daıyndap, oblys ákimine, oblys prokýrory, oblystyq sot tóraǵasy men oblystyq jerdiń paıdalanylýy men qorǵalýyn baqylaý basqarmasy basshylaryna usynys jibergen. Hatta Batys Qazaqstan oblysynyń tájirıbesine súıenip, memlekettik organdarmen birlesip jumys tobyn quryp,árbir ýchaskege shyǵyp, jerdi úsh topqa bólý kerek delingen. Olar: tolyq meńgerilgen jerler, qurylysy júrgizilip jatqan aýmaqtar men bos jatqan ýchaskeler. 1 men 2 sanatty jerlerdi sotqa jibermeı, kásippen aınalysýyna, tek 3 sanatty jerlerdi sotqa jiberý týraly usynys berildi.
