Mańǵystaýda Wi-Fi men beınekamerasy bar jańa avtobýstar paıdalanýǵa berildi

AQTAÝ. QazAqparat - Mańǵystaýda ulttyq mereke qarsańynda Wi-Fi men beınekamerasy, GPS, aýa baptaǵyshtary bar jańa 16 avtobýs paıdalanýǵa berildi, dep habarlaıdy QazAqparat tilshisi.

«Elimiz táýelsizdik alǵan soń qurylǵan tuńǵysh aýdan – Munaıly aýdany turǵyndary úshin búgin úlken mereke dep esepteımin. Aýdan men Aqtaý qalasyn jalǵap turǵan negizgi ári jalǵyz №105 marshrýt avtobýstary 100% jańardy. Qoǵamdyq kóliktiń bul modeli Qazaqstanda shyǵarylǵan. Mundaı ásem ári zamanaýı avtobýstar alǵash retAqtaý qalasy men Munaıly aýdanyna berilip jatyr«, - dedi Mańǵystaý oblysy ákiminiń birinshi orynbasary Bekbol Orynbasarov.

Jańa avtobýstardaǵy jolaýshylar syıymdylyǵy - 78 oryn. «Yutong ZK 6116HG» markaly ár avtobýsqa 5 beınebaqylaý kamerasy, GPS, aýa baptaǵyshtar ornatylǵan. Qoǵamdyq kóliktegi beınebaqylaý kameralary tikeleı Mańǵystaý oblystyq ishki ister departamentiniń jedel basqarý ortalyǵyna qosylǵan.

Sonymen qatar, avtobýsta múgedektigi bar jandarǵa arnalǵan oryn, onlaın tólem qabyldaý termınaldary, telefon qýattaǵysh jáne Wi-Fi bar. Avtobýstar - tolyqtaı otandyq ónim.

Avtobýstar «Kaspıı» ÁKK» AQ-nyń «Aqtaý qalasy men Mańǵystaý óńiriniń avtobýs parkin jańartý» jobasy aıasynda 7 jyl merzimge lızıng shartymen satyp alyndy. Jobanyń jalpy quny - 1,4 mlrd teńge.

Aıta ketsek, maýsym aıynda osy joba aıasynda 12 avtobýs Aqtaý qalasyndaǵy №2 marshrýtty jańalaý úshin qoldanysqa berilgen bolatyn.