Mańǵystaýda vedomstvoaralyq úılestirý keńesiniń alǵashqy otyrysy ótti
AQTAÝ. QazAqparat - Mańǵystaý oblysynyń ákimi Eraly Toǵjanovtyń tóraǵalyǵymen oblystyń vedomstvoaralyq úılestirý keńesiniń alǵashqy otyrysy ótti, dep habarlaıdy óńir basshysynyń resmı saıty.
Kún tártibinde qorshaǵan ortany qorǵaý, onyń ishinde Hımıko-gıdrometallýrgııalyq zaýyttyń máseleleri, turǵyndardy sport ǵımarattarymen qamtamasyz etý, jol-kólik oqıǵasynyń aldyn alýǵa baǵyttalǵan is-sharalar keshenin júzege asyrý, qalalar men aýdandardyń ınfraqurylymyn damytý men josparlaýdy jaqsartý syndy birqatar máseleler qaraldy.
«Keńestiń maqsaty - qoǵamdyq densaýlyq saqtaýda múddeli taraptardyń kúsh-jigerin biriktirý.Sońǵy jyldary Qazaqstanda sozylmaly ınfektsııalyq emes aýrýlardy dıagnostıkalaýǵa jáne emdeýge shyǵyndardyń óskeni baıqalady. Bul memlekettiń densaýlyq saqtaýǵa baǵyttalǵan barlyq shyǵyndarynyń 95-96 paıyzyn quraıdy, al profılaktıkaǵa 3 paıyz ǵana jumsalady. Osyǵan baılanysty, kúndelikti salaýatty ómir saltyn ustaný jáne qalyptastyrý maqsatynda ár qazaqstandyq úshin ómirdiń sapasy men uzaq ómir súrýdiń kepili bolatyn tıimdi sharalardyń qabyldanýy qajet. Odan ári osy sharalardyń sapaly oryndalýyna qajetti qarajattardyń bólinýi tıis», - dedi Mańǵystaý oblysynyń ákimi Eraly Toǵjanov.
Jıyn barysynda Qorshaǵan ortany qorǵaý, aýmaqtyń ekologııalyq jaǵdaıyn jaqsartý, onyń ishinde Hımıko gıdrometallýrgııalyq zavodtyń máseleleri jáne ony sheshý joldary týraly ekologııa departamentiniń basshysynyń mindetin atqarýshy Rýslan Týkenov málimdedi.
Aǵymdaǵy jyldyń qorytyndysy boıynsha Departament tarapynan oblystaǵy tabıǵat paıdalanýshylar is-sharýashylyǵyna 8 tekserý júrgizilip, 58 ekologııalyq zań talaptarynyń buzylý faktisi anyqtalǵan.
«Nátıjesinde, kináli tulǵalarǵa jalpy somasy 44 122 584 teńgeni quraıtyn 55 ákimshilik ister qozǵaldy. Búgingi tańda, salynǵan aıyppuldardyń 4 140 490 teńgesi memleket paıdasyna óndirildi, qalǵan 39 982 094 teńgesi oryndalýda (tóleý merzimi shyqpaǵan). Sonymen qatar, ekologııalyq zańnama talaptaryn buzý saldarynan qorshaǵan ortaǵa keltirilgen zalaldy óteý maqsatynda Departament tarapynan aǵymdaǵy jyly jalpy somasy 44 224 670 teńgeni quraıtyn 4 nusqama berildi», - dedi Rýslan Týkenov.
Tabıǵı qorlar jáne tabıǵat paıdalanýdy retteý basqarmasynyń basshysy Dúısen Kusbekovtiń baıandamasyna sáıkes, Basqudyq aýylynyń sanıtarlyq-gıgıenalyq, ekologııalyq jaǵdaıyn jáne mıkroklımattyn turaqtandyrý úshin «Qoshqar-Ata» qaldyq qoımasynyń ońtústik-batys bóliginde jalpy aýmaǵy 8,2 ga tájirıbelik jasyl qorǵanysh aımaǵy, sondaı-aq, osyǵan uqsas aýdany 30 gektar jasyl qorǵanysh aımaǵyn qurý jumystary qolǵa alyndy. Oblys ákiminiń tapsyrmasymen bıyl qosymsha aýdany 30 gektar quraıtyn kelesi jasyl qorǵanysh aımaǵyn qurý jumystaryna memlekettik satyp alý júrgizilýde. Jasandy kóldiń suıyq fazasyn turaqtandyrý maqsatynda Aqtaý qalasyndaǵy kárizdik tazartý ǵımaratynan (KOS-1) jyl saıyn tazalanǵan 7,8-8,4 mln. m³sý quıylady.
Sonymen qatar aıtylǵan máselelerge oraı Jer qatynastar basqarmasynyń basshysy Esemurat Dúzmaǵambetov baıandady.
Oblysta 2018 jyldyń 1 naýryzyndaǵy jaǵdaı boıynsha barlaýǵa jáne óndirýge arnalǵan 243 jer qoınaýyn paıdalaný kelisimsharttary tirkelgen. «Qazaqstan Ǵarysh Sapary» Ulttyq kompanııasy» aktsıonerlik qoǵamynyń derekterine sáıkes, monıtorıng qorytyndysymen 62 eldi mekende jer-kadastr bazasyna enbegen 5000-ǵa jýyq qurylys nysandary jóninde málimetter kórsetilgen.
«Oblysta tirkelgen 96 paıyz jer qoınaýyn paıdalanýshynyń ýchaskesinde kelisimsharttan tys paıdalanylǵan aımaqtar belgili boldy. Sonymen birge, ǵaryshtyq túsirilimder negizinde Jańaózen qalasynyń soltústigindegi «Ózenmunaıgaz» AQ men «Almeks plıýs» JShS-niń aýmaǵynda jalpy kólemi 165,7 gektar jerde munaı qaldyqtarymen lastanǵan 471 jer ýchaskeleri anyqtaldy», - dedi Jer qatynastar basqarmasynyń basshysy Esemurat Dúzmaǵambetov.
