Mańǵystaýda vaktsına egetin arnaıy 10 bólme daıyndaldy

AQTAÝ. QazAqparat - Mańǵystaý oblysynda vaktsınatsııany júzege asyratyn 10 egý bólmesi daıyn, dep habarlaıdy QazAqparat tilshisi óńirdiń qoǵamdyq kommýnıkatsııa ortalyǵyna silteme jasap.

Onyń ishinde 2 – Aqtaý qalasynda, 3 – Jańaózende, 1 – Qaraqııa aýdanynda, 1 – Túpqaraǵan aýdanynda, 1 – Beıneý aýdanynda, 1 – Mańǵystaý aýdanynda jáne taǵy bireýi Munaıly aýdanynda ornalasqan.

Mańǵystaý oblysy densaýlyq saqtaý basqarmasynyń basshysy Jamal Jamanbaevanyń aıtýynsha, óńirlik densaýlyq saqtaý basqarmasy birqatar daıyndyq jumysyn júrgizilýde.

Atap aıtsaq, vaktsınatsııa marshrýty jasaqtaldy. Vaktsınany saqtaıtyn arnaıy muzdatqyshtar, termokonteınerler men hladoelementter daıyndaldy. Budan bólek qosymsha muzdatqyshtar satyp alý josparda bar. Emhanalarda egý kabınetteri daıyn. Barlyq medıtsına qyzmetkeri oqýdan ótip jatyr. Egýge belgilengen adamdar tizimi belgilendi.

Jalpy Densaýlyq saqtaý mınıstrliginiń jospary boıynsha Qazaqstanda jyldyń aıaǵyna deıin 6 mıllıonǵa jýyq adam koronavırýs ınfektsııasyna qarsy vaktsına alý qajet. Egilgenderge arnaıy elektrondy pasport toltyrylady. Ázirge «Spýtnık V» reseı vaktsınasy qoldanylady. Al ári qaraı «Kaz Kovıd» elimizdiń vaktsınasy alynady. «Kaz Kovıd» 2 tekseris fazasynan ótip, onyń adam densaýlyǵyna qaýipsiz ekendigi dáleldendi. Endi klınıkalyq tekseristiń 3-kezeńi shamamen 2021 jyldyń maýsym aıynda aıaqtalady.

«Aıta keteıik, vaktsınatsııa – barlyq ınfektsııalyq aýrýlardyń aldyn-alatyn birden-bir tásil. Vaktsınatsııa nátıjesinde barlyq aýrýshańdyq pen ólim-jetim azaıady. Óıtkeni, adam balasy dúnıege kelgeli tek koronavırýsqa qarsy emes basqa da vaktsına ala bastaıdy», - dedi Jamal Jamanbaeva.

Spıkerdiń aıtýynsha, qazirgi tańda epıdemıologııalyq ahýal nasharlap kele jatyr. Mańǵystaý oblysy jasyl aımaqta bolsa da, koronavırýs indetin juqtyrǵandardyń sany kúnnen-kúnge ósýde. Máselen, ınfektsııalyq statsıonarlarda 112 adam koronavırýstyq pnevmonııamen em alyp jatsa, 41 naýqastyń koronavırýs ınfektsııasyna tapsyrylǵan test synamasy oń nátıje kórsetti. 112 naýqastyń ishinde 20 bala bar, onyń ekeýiniń test qorytyndysy oń. Sondaı-aq, naýqastardyń arasynda 7 júkti áıel bar. Onyń 5 koronavırýs ınfektsııasyna shaldyqqan. Jalpy emhanalarda 135 adam sımptomsyz jáne jeńil sımptomdarmen tirkelip, protokol boıynsha em qabyldap júr.

«Ǵalymdardyń boljamy boıynsha, qazir koronavırýstyq ınfektsııasynyń 2-tolqyny bastaldy. Onyń eń joǵarǵy satysy aqpan-naýryz aılaryna sáıkes kelip otyr. Sol sebepti saqtyq sharalaryn qatań ustanyp, ózimizge de, jaqyndarymyzǵa da qamqor bolaıyq», - dedi Jamal Jamanbaeva.

Eske salsaq, buǵan deıin Qazaqstanda koronavırýsqa qarsy vaktsına 1 aqpannan bastap egiletindigi habarlandy.

Sonymen qatar 18 jasqa tolmaǵan balalar men 65 jastan asqan adamdarǵa vaktsınanyń tıimdiligi men qaýipsizdigi týraly málimet joq, sondyqtan bul jastaǵylarǵa ekpe salynbaıdy. Al Úkimet otyrysynda Prezıdent Qasym-Jomart Toqaev ákimderge vaktsınatsııa máselesinde dúrbeleńge jol bermeýdi tapsyrdy.