Mańǵystaýda úzdik ustazdar marapattaldy
AQTAÝ. QazAqparat - Mańǵystaý oblysynda Ustazdar kúnine oraı saltanatty jıyn ótip, onda oblys ákimi úzdik pedagogtarǵa 500 myń teńge qarjylaı syıaqy tabystady,-dep habarlaıdy QazAqparat tilshisi.
Ustazdar kúnine oraı uıymdastyrylǵan sharada «Bilim úzdigi-2018» baıqaýynyń nátıjesi jarııalanyp, óz kásibiniń sheberi dep tanylǵan pedagogtar men úzdik mektep ujymyna oblys ákiminiń syıaqysy tabystaldy.
Osyǵan deıin konkýrsqa qatysý úshin 150 pedagog jáne 20 bilim berý uıymy qujattaryn usynǵan.
Jalpy, 18 nomınatsııa: «Úzdik jyl pedagogy», «Úzdik tehnologııalardy qoldanýshy», «Úzdik shyǵarmashyl muǵalim», «Úzdik jetistikter sheberi», «Úzdik daryndy balalar jetekshisi», «Úzdik pedagogıkalyq jańa ıdeıalar», «Úzdik ádistemeni usynýshy», «Úzdik arnaıy bilim berý sheberi», «Úzdik ulttyq dástúrdi nasıhattaýshy», «Úzdik polıglot muǵalim», «Úzdik qosymsha bilim berý sheberi», «Úzdik mektepke deıingi uıym», «Úzdik aýyl mektebi», «Úzdik qala mektebi», «Úzdik qosymsha bilim berý uıymy», «Úzdik tehnıkalyq jáne kásiptik bilim berý uıymy», «Úzdik óndiristik oqytý sheberi», «Úzdik arnaıy pán oqytýshysy» ataqtarynda úzdikter anyqtaldy. Onyń ishinde 12 atalymǵa 500 myń teńge, «Jyl muǵalimi» nomınatsııasyna jáne 5 bilim uıymyna 1 mıllıon teńge syıaqy tabystaldy.
Bıylǵy jyldyń úzdik ustazy jańaózendik Rametýlla Zlıha atandy. Ol Jańaózen qalasy mektep-gımnazııasynda aǵylshyn tili páninen sabaq beredi. «Munaı - gaz salasy mamandyqtaryna arnalǵan mátinder» jınaǵynyń, «Kásibı aǵylshyn tilin oqyp úırenýge arnalǵan» ádistemelik praktıkalyq quraldaryn jazǵan.
Al, aqtyq synǵa deıin jetken Tilektes Serikbaıqyzyna óńir basshysy tosynsyı retinde qosymsha 500 myń teńge syıaqy taǵaıyndady.
Oblys ákimi Mańǵystaý halqynyń birneshe urpaǵyn tárbıeleýge qosqan zor úlesi úshin bilim qyzmetkerleri men ardagerlerine alǵysyn bildirdi.
Eraly Toǵjanov Elbasy Nursultan Ábishuly Nazarbaevtyń elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn arttyrýǵa baǵyttalǵan Joldaýyn jarııalaǵanyn atap ótti.
«Memleekt basshysynyń «Pedagog mártebesi týraly» zań qabyldaý jóninde tapsyrmasyn barsha ustazdar qaýymy zor yqylaspen qabyldady. Bul - pedagogtarǵa degen erekshe qamqorlyq pen qoldaý dep bilemiz. Bilim salasyna, sonyń ishinde mektepke deıingi tárbıe men oqytýǵa erekshe kóńil bólý jóninde naqty tapsyrmalar berildi. Úsh aýysymdy jáne apatty mektepterdi joıý, oqýshy ornynyń tapshylyǵyn azaıtý jóninde aıtyldy», - dedi óńir basshysy.
Bıyl oblystyq bilim salasynda aýqymdy sharalar atqaryldy. Bir jyldyń ózinde oblysta 9 mektep iske qosylyp, halyqtyń ıgiligine berildi. Aqtaý qalasyndaǵy №29 jańa bilim ordasy smart-mektep bolyp ashyldy. Onda STEM-laboratorııa, smart-jylyjaı, galografıkalyq aqparattandyrý buryshtary, chıp arqyly oqýshylardyń mektepke kelip-ketýin qadaǵalaý jobalary engizilip, oblys mektepterinde 17 ІT synyby, 25 jylyjaı ashyldy. Jańa oqý jylynan bastap jańartylǵan bilim mazmuny boıynsha sabaq beretin pedagogtardyń 75 paıyzy biliktiligin arttyrýǵa, oblys muǵalimderiniń 80 paıyzynyń jalaqylaryna ústemaqy qosyldy.
Sondaı-aq, shara barysynda óńir basshysy 2 muǵalimdi «Ybyraı Altynsarın», 5 muǵalimdi «Bilim berý isiniń qurmetti qyzmetkeri» tósbelgilerimen marapattady, taǵy 7 ustaz oblys ákiminiń alǵys hattaryn aldy.
