Mańǵystaýda úıdi tonap, ıesin órtep ketken qylmysker sottaldy
AQTAÝ. QazAqparat - Mańǵystaýda úı ıesin pyshaqtap óltirip, órtep ketken uryǵa qatysty sot úkimi shyqty, dep habarlaıdy Qazaqparat tilshisi.
MO qylmystyq soty baspasóz qyzmetiniń málimetinshe, ury terezeni syndyrý arqyly kirgen. Ol dereý baǵaly zattar men aqsha izdeı bastaıdy. Úı ıesi shýdan oıanyp ketedi. Áıel adamdy kórgen baýkespe dereý shap berip, birneshe jerine pyshaq suqqan. Ári qaraı tapqan 100 myń teńge aqshasyn alyp, úıdi órtep, oqıǵa ornynan qashyp ketken.
Sottalýshyǵa qatysty QR qylmystyq kodeksiniń birneshe baby boıynsha is qozǵalǵan. Atap aıtsaq, 99-bap - Adam óltirý; 188-bap - Urlyq; 287-bap - qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý.
Qylmyskerge 17 jylǵa bas bostandyǵynan aıyrý týraly sheshim shyqty.
