Mańǵystaýda ustalǵan uıymdasqan qylmystyq toptan kóptegen qarý-jaraq tárkilendi - UQK

AQTAÝ. QazAqparat - Mańǵystaý oblysynda arnaıy operatsııa kezinde ustalǵan uıymdasqan qylmystyq top múshelerinen kóptegen qarý-jaraq tárkilendi, dep habarlaıdy QazAqparat QR UQK baspasóz qyzmetine silteme jasap.

«QR Ulttyq qaýipsizdik komıteti birneshe aı kóleminde QR Іshki ister mınıstrligimen birlese otyryp, Mańǵystaý oblysynyń krımınogendik ahýalyna eleýli áseri bar uıymdasqan qylmystyq toptarǵa qatysty jedel tekserý is-sharalaryn júzege asyrdy.

Júrgizilgen is-sharalar nátıjesinde uıymdasqan top músheleriniń aýyr jáne asa aýyr qylmystarǵa, onyń ishinde adam óltirýge oqtalý, adam urlaý, qaraqshylyq shabýyl jasaý jáne basqa da faktilerge qatystylyqtary anyqtalyp, qujattaldy», delingen habarlamada.

29 shildede QR UQK men QR ІІM aýqymdy arnaıy is-sharany ótkizip, Jańaózen qalasy men Munaıly aýdanynda bir mezgilde tórt túrli toptan 17 adam ustady.

«Olardyń meken-jaılary boıynsha júrgizilgen tintý jumystary barysynda 3 dana tapansha men 1 dana dybyssóndirgish, 8 dana kesilgen ańshy qarýy, 1 dana «Saıga» karabıni, 1 dana usaq kalıbrli vıntovka, 5 dana travmatıkalyq tapansha, 218 dana oq-dári, túrli sýyq qarýlar (pyshaqtar, kastetter jáne t.b.) tabylyp, aıǵaq zat retinde tárkilendi», delingen habarlamada.

Baspasóz qyzmetiniń habarlaýynsha, QR UQK men QR ІІM qyzmetkerlerinen qurylǵan vedomstvoaralyq jedel tergeý toby sotqa deıingi tergeý amaldaryn júrgizýde.

Eske sala ketsek, QR Bas prokýratýrasy 29 shildede Ulttyq qaýipsizdik komıteti, Іshki ister mınıstrligimen birlese otyryp Mańǵystaý oblysynda uıymdasqan qylmystyq top músheleriniń zańǵa qarsy áreketteriniń jolyn kesý boıynsha aýqymdy arnaıy operatsııa bastaǵanyn málim etken edi.