Mańǵystaýda ulyn júrgizýshi etip jumysqa alǵan ákim jazalandy

AQTAÝ. QazAqparat - Mańǵystaý oblysy Qaraqııa aýdany Senek aýylynyń ákimi ulyn kólik júrgizýshi etip jumysqa alǵany úshin sógis túrinde jaza aldy, dep habarlaıdy QazAqparat tilshisi.

Facebook áleýmettik jelisinde Senek aýylynyń ákimi jeke sharýalaryna qyzmettik kólikpen baratyny, júrgizýshisi óziniń balasy ekeni jáne balasy qalada jumys isteıtini jóninde jazba jarııalanǵan.

Ádep keńesine kelgen ákim aýylda basqa kólik júrgizýshisi tabylmaǵandyqtan ulyn selo ákiminiń qyzmettik kóligine júrgizýshi etip jumysqa alǵanyn, qyzmettik kólik ákimshilik aýmaǵyndaǵy sharýashylyq qojalyqtaryna baratynyn jáne balasy basqa seriktestikke aýysymdyq jumysqa ornalasqannan keıin tabelge tek jumysqa kelgen kúnderin ǵana kórsetip otyrǵanyn jetkizdi.

Alaıda, qosymsha tekserý kezinde Senek aýyly ákimdiginiń apparatynan «Kólik júrgizýshi» mamandyǵy boıynsha suranys bolmaǵany anyqtaldy.

Buǵan qosa, seriktestikte aýysymdyq jumysqa ornalasýyna baılanysty avtokólik júrgizýshi balasyna qatysty jumys ýaqytyn qysqartý týraly ókim shyǵarylmaı, tek tabelge jumys atqarǵan ýaqytyna saǵat belgileýmen shektelip kelgen.

Keńes músheleri ákim B.Erkeǵulovtyń óz kinásin moıyndaǵanyn eskerip, Ádep kodeksiniń talabyn buzǵany úshin oǵan «sógis» túrindegi tártiptik jaza qoldaný týraly sheshim qabyldady.