Mańǵystaýda úlgili aýyl baıqaýy uıymdastyryldy
ASTANA. QazAqparat - Mańǵystaýda Elbasynyń «Bolashaqqa baǵdar: rýhanı jańǵyrý» maqalasynyń «Týǵan jer» baǵdarlamasy aıasynda uıymdastyrylǵan «Úlgili aýyl» baıqaýy óz máresine jetti, dep habarlaıdy oblystyq ákimdiktiń baspasóz qyzmeti.
Aýyldyq eldi mekenderde adam ómiri men densaýlyǵy úshin qolaıly ortany qalyptastyrý maqsatynda Mańǵystaý oblysy ákimdiginiń qoldaýymen ótkizilgen bul konkýrsqa turǵylyqty halyq sany 3 myńnan asatyn jáne 3 myńnan az aýyldar bolyp eki topqa bóline qatysty. Aýdan ishinen úzdik dep tanylǵan aýyldar oblystyq baıqaýǵa usynyldy.
Ár aýylda turǵyndarǵa qolaıly jaǵdaı jasaý úshin jasyl arhıtektýra jospary jasalyp, kógaldandyrý, abattandyrý jumystary josparly túrde júrgizilýde. Mysaly, óńirdegi sý tapshylyǵyna qaramastan Taýshyq aýylynda aýmaǵy 3,2 ga ortalyq saıabaqqa 900 túp aǵash otyrǵyzyp, baptap keledi. Sondaı-aq, kóshe boıyna 672 elektr shamy ornatylyp, tolyq jaryqtandyrylǵan.
Arnaıy jasaqtalǵan jumys toby baıqaýǵa usynylǵan 8 aýyldy aralap, olardyń erekshelikteri boıynsha anyqtama ázirledi. «Úlgili aýyl» oblystyq baıqaýyn sarapshy komıssııa tómendegideı qortyndylady:
1. Turǵylyqty halyq sany 3 myńnan asatyn aýyldar arasyndaǵy baıqaý qorytyndysy boıynsha:
I oryn - Túpqaraǵan aýdanynyń Taýshyq aýylyna 10,0 mln. teńge syıaqy;
II oryn - Qaraqııa aýdanynyń Jetibaı aýylyna 7,5 mln. teńge syıaqy;
III oryn - Beıneý aýdanynyń Boranqul aýylyna 5,0 mln. teńge syıaqy;
Yntalandyrý syılyǵy - Munaıly aýdanynyń Dáýlet aýylyna 2,0 mln. teńge syıaqy berildi.
2. Turǵylyqty halyq sany 3 myńnan az aýyldar arasyndaǵy baıqaý qorytyndysy boıynsha:
I oryn - Mańǵystaý aýdanynyń Úshtaǵan aýylyna 10,0 mln. teńge syıaqy;
II oryn - Qaraqııa aýdanynyń Senek aýylyna 7,5 mln. teńge syıaqy;
III oryn - Beıneý aýdanynyń Sarǵa aýylyna 5,0 mln. teńge syıaqy;
Yntalandyrý syılyǵy - Túpqaraǵan aýdanynyń Qyzylózen aýylyna 2,0 mln. teńge syıaqy tabystaldy.
Baıqaý shartyna sáıkes jeńimpaz atanǵan aýyldar syıaqynyń 80%-yn kógaldandyrý, abattandyrý jumystaryna jumsaýy tıis. Al 20 %-ynan aspaıtyn mólsherde aýyl nysandaryn kógaldandyrý, abattandyrý jáne sanıtarlyq tazalaý jumystaryna úles qosqan zańdy jáne jeke tulǵalardy marapattaýǵa usynyldy. Atalmysh baıqaý jyl saıyn dástúrli túrde ótkiziletin bolady.
