Mańǵystaýda tyıym salynǵan jerde sýǵa túskenderge aıyppul salynbaq
ASTANA. QazAqparat - Endi tyıym salynǵan aımaqta sýǵa túsken adamdarǵa aıyppul salynady. Mańǵystaý oblysy Tótenshe jaǵdaılar basqarmasy men ákimdik osyndaı sharany qolǵa almaq, dep habarlaıdy QazAqparat tilshisi.
Sebebi Mańǵystaýda shomylý maýsymy bastalǵaly 5 adam teńizge batyp ketken. Onyń 3-eýi tyıym salynǵan aımaqqa sýǵa túskendikten qaza tapqan. Sondyqtan, osy shara qolǵa alynyp otyr. Bul týraly qalalyq ákimdik alańynda bolǵan baspasóz máslıhatynda málim boldy.
Jalpy, qutqarýshylar jyl basynan beri 11 adamdy aman alyp qalǵan. Tótenshe jaǵdaılar basqarmasynyń mamandary turǵyndar men týrısterdiń kópshiligi qaýipsiz jerlerge shomylmaıtynyn aıtady. Olarǵa aıtylǵan eskertýler da elenbeı qalyp jatady.
«Aıyppul somasy ár túrli. 14 myń teńgeden 40 myń teńge aralyǵynda salynady. Jeke jáne zańdy tulǵa bolýyna baılanysty. Sebebi, turǵyndarǵa aıtyp túsindire almaısyń. Tipti, sýǵa ketip qalǵan adamnyń denesin izdep júrgen kezde, bul jerge shomylýǵa bolmaıtynyn aıtsaq, elemeıdi. Tyńdamaıdy. Qalaı túsindirerimizdi bilmeımiz. Sondyqtan aıyppul salý - eń tıimdi sheshim dep taptyq. Adam ómiri oıynshyq emes qoı», - deıdi MO TJB jedel qutqarý jasaǵynyń basshysy Vladımır Arzıýtov.
Qutqarýshylar turǵyndardy sýǵa túsý kezinde abaı bolyp, qarapaıym qaýipsizdik sharalaryn saqtaýǵa shaqyrady. Qazir qala boıynsha 1 jedel qutqarý bólimshesi jumys isteıdi. Onda 36 maman qyzmet etedi. 15 júzý quraly, 10 tehnıka: súńgýir jáne qutqarý qondyrǵylary bar. Túsindirý jumystaryn júrgizý úshin eriktiler de tartylǵan.
