Mańǵystaýda túıeler belgisiz kesel juqtyrdy

AQTAÝ. QazAqparat - Mańǵystaýda belgisiz indet juqtyrǵan túıelerden alynǵan synamalar 3 táýelsiz veterınarııalyq ǵylymı-zertteý ınstıtýtyna joldandy, dep habarlaıdy QazAqparat tilshisi. Bul týraly óńirlik kommýnıkatsııa qyzmetinde ótken brıfıng barysynda oblys ákiminiń orynbasary Baqytjan Qashaqov málim etti.

2019 jyldyń kúz aılarynan beri oblysta ázirge belgisiz indetpen 1139 túıe aýyrǵan, 1112 túıeni emdegen. Túıeniń belgisiz indeti Aqtaý qalasy men Beıneý aýdanynan basqa jerlerde beleń alǵan.

Aıta keteıik, iri qaranyń ólgeni tirkelgen joq.

«Juqpaly aýrýdan túıeniń aýyz qýysy, erinderi men murny qabynyp, shóp jeýi, sý ishýi qıyndaǵa. Antıbıotıktermen ýaqtyly emdelgen túıeler 1 aptanyń ishinde tolyqtaı saýyǵyp ketedi» - deıdi QR Aýyl sharýashylyǵy mınıstrligi veterınarııalyq baqylaý jáne qadaǵalaý komıtetiniń Mańǵystaý oblystyq aýmaqtyq ınspektsııasynyń basshysy Qýanyshkereı Myrzatov.

Juqpaly indetttiń dıagnozy veterınarııalyq dıagnostıkalyq zerthananyń qorytyndysy negizinde ǵana belgili bolady. Aýyl sharýashylyǵy mınıstrligine qarasy dıagnostıkalyq ortalyqqa barlyǵy 70 túıeden synamalar alynyp, tekserýden ótkizilgen. Oblysqa 3 ret ortalyqtyń ekspert mamandary shaqyrtylyp, monıtorıng júrgizilgen.

Dıagnostıkalyq mekemelerdiń qorytyndylaryna sáıkes, zerttelgen túıelerde asa qaýipti aýrýlar anyqtalmaǵan.

Jeltoqsan aıynyń basynda 12 túıeden alynǵan materıaldar elimizdiń 3 túrli táýelsiz veterınarııalyq ǵylymı-zertteý ınstıtýttaryna joldanǵan. Vırýsologııalyq zertteýler qorytyndysy ázirge shyqqan joq.

Eger asa qaýipti kesel anyqtalatyn bolsa, QR veterınarııa salasyndaǵy zańnamalaryna sáıkes, ony joıý jumystary júrgiziletin bolady.