Mańǵystaýda túıege soǵylǵan kóliktegi jolaýshy kóz jumdy
Oqıǵa 22 qyrkúıek saǵat 21:50 shamasynda Aqtaý-Jańaózen trassasynyń 26/760 shaqyrymynda bolǵan.
«GEELY SC7 markaly avtokóliktiń júrgizýshisi jol boıyndaǵy túıeni qaǵyp ketken. Saldarynan 57 jastaǵy jolaýshy kóz jumdy. Bir jolaýshy oblystyq aýrýhanaǵa jetkizildi» dedi Mańǵystaý oblystyq polıtsııa departamentiniń baspasóz qyzmetinen.
Atalǵan fakti QR Qylmystyq kodeksiniń 345-baby 3-bóligi boıynsha tirkelip, tergeý bastalǵan.
Bir apta buryn Jetibaı-Aqtaý tas jolynyń boıynda kólik túıelerge soǵylyp, eki jolaýshynyń mert bolǵanyn jazǵan edik.
Jalpy Mańǵystaýda kóliktiń jol boıynda malmen soǵysýy jıilep ketken. Soǵan baılanysty jańaózendik polıtseıler túıe men jylqyǵa jaryq shaǵylystyrǵysh jolaq japsyrýdy usynyp keledi.
«Jolaqtar qymbat emes. Jolaqty maldyń moınyna nemese aıaǵyna baılap qoıý kerek. Túngi ýaqytta jaryq shaǵylystyrǵysh jolaq kólik júrgizýshisine 300-350 metr qashyqtyqtan anyq kórinip, kólik apatyn boldyrmaýǵa septigin tıgizedi. Maly bar jergilikti jurt bul ózgeriske oń qabaq tanytyp otyr. Sebebi túngi ýaqytta maldyń qaı tusta jaıylyp júrgenin bilip otyrý olarǵa da qajet», - dedi Jańaózen qalasy polıtsııa basqarmasy bastyǵynyń birinshi orynbasary Ǵalymjan Maqsutuly.