Mańǵystaýda túıe sútinen balmuzdaq pen sýsyndar daıyndalmaq
AQTAÝ. QazAqparat - Mańǵystaýlyq kásipkerler túıe sútinen balmuzdaq pen basqa da táttiler daıyndap shyǵarmaq, dep habarlaıdy QazAqparat tilshisi.
Óńir kásipkerler arab tehnologııasyn paıdalanyp, zaýyt salýdy josparlap otyr. Bul týraly óńirlik kommýnıkatsııalar qyzmetiniń alańynda ótken brıfıngte «Kaspıı» áleýmettik-kásipkerlik koorporatsııasy AQ basqarma basshysynyń m.a. Lesbek Іlebaev aıtty.
Mańǵystaý oblysy túıe sharýashylyǵyn damytýǵa keńinen kóńil bólip keledi. Bul maqsatta bıyl bıýdjetten 105 mln teńge bólingen. «Arýana» tuqymynyń túıelerin ósirip, odan shyǵatyn ónimdi qaıta óńdeýge jalpy 210 mln teńge qarastyrylǵan. Sondyqtan túrli jobalar qolǵa alynýda.
«Bul kásiporyn shyǵarǵan ónimderin ózge memleketterge eksporttaıdy. El ekonomıkasyna da kásipkerge de paıda ákelip otyr. Túıe sútin tanymal brendke aınaldyrǵan. Muny nege Mańǵystaýǵa qolǵa almasqa? Sebebi, arab eliniń tabıǵat kesheni bizdiń óńirmen birdeı. Kásipkerlerge múmkindik bar, - deıdi Lesbek Іlebaev.
Onyń aıtýynsha, bul úshin kóp jumys jasaý kerek. Qazir arab kásipkerlerimen tolyqtaı aqparat almasylǵan. Tehnologııalary men óndiristegi tehnıkalaryn qoldanýǵa múmkindik bar.
Mańǵystaýlyq kásipkerler 300-den astam túıe satyp alýdy josparlap otyr. Bul baǵytta «Kaspıı Arýana» JShS qurylǵan.
Aıta keteıik, aımaq basshysy Eraly Toǵjanov bastaǵan delegatsııanyń Birikken Arab Ámirlikterine jýyrda jasaǵan sapar barysynda túıe sharýashylyǵyn dóńgeletip otyrǵan Abý-Dabıdegi «Camelicious» kásipornyna arnaıy bardy. Sebebi, bul kásiporyn túıe sútinen túrli ónimderdi daıyndaıdy. Іrimshik, balmuzdaq, shokolad, ıogýrt, tipti energetıkalyq sýsyndar shyǵarady. 5 500-den astam túıesi bar. Zaýyt zamanaýı tehnologııalardy jáne túıelerdi halyqaralyq standarttarǵa sáıkestendirýdi keńinen zertteıdi.
