Mańǵystaýda túıe qyrylyp jatyr degen habar jalǵan bolyp shyqty
ASTANA. QazAqparat - Buqaralyq aqparat quraldary taratqan Mańǵystaýdyń Jarmysh aýylynda túıeler qyrylyp jatqany týraly aqparat jalǵan bolyp shyqty. Bul týraly «QazAqparat» HAA tilshisi Mańǵystaý oblystyq veterınarııa basqarmasynyń basshysy Shamǵalı Hamıevke siltememen habarlaıdy.
Basqarma basshysynyń aıtýynsha, jyl basynan beri Mańǵystaý aýdanynda Oısylqara túliginiń ártúrli indetke shaldyqqany týraly tek 10 derek tirkelgen. Olardyń ekeýinen ǵana qutyrý dertiniń qozdyrǵysh belgileri anyqtalypty. Qazir osy jaǵdaıǵa baılanysty basqarma mamandary Jarmysh aýylynda tekserý jumystaryn júrgizýde.
«Jarmysh okrýginde 40 túıe óldi degen sybys shyqqan. Ol jerde ondaı málimet resmı tirkelgen joq. Jalǵyz Jarmysh emes, aýdandaǵy búkil aýyldar boıynsha eki aıdyń ishinde 10 túıeniń ǵana materıaly tapsyrylǵan. Sodan eki túıeden qutyrýdyń qozdyrǵyshy anyqtaldy. Qutyrý aýrýy qorytyndysy berilgen eki sharýashylyqqa shekteý sharalary engizildi. Qutyrý - karantın jarııalanatyn aýrýdyń túrine kirmeıdi, tek shekteý sharalary engiziledi», - deıdi Mańǵystaý oblystyq veterınarııa basqarmasynyń basshysy Shamǵalı Hamıev.
Saǵıra Kúzembaeva
