Mańǵystaýda turmystyq qaldyqtardy suryptaıtyn keshen ashylady
«Kompanııa qaldyqtardy suryptap, kádege jaratýdyń 3 tásilin qoldanady: bıologııalyq, fızıka-hımııalyq, termıkalyq. Joba qorshaǵan ortany qorǵaýǵa baǵyttalǵan. Sebebi kóp qaldyq ekologııany lastaıdy», - dedi mekeme basshysy Azamat Taǵanov.
2023 jyldyń aıaǵyna deıin Aqtaý qalasynan 52 shaqyrym qashyqtyqta 20 ga jerge turmystyu qaldyqtardy qaıta óńdeý kesheni bar polıgon iske qosylmaq. Joba quny 700 mıllıon teńgeni quraıdy.
Jalpy, qaldyqtardy suryptaý, qaıta kádege jaratý jumystary Aqtaý, Jańaózen qalalarynda jáne Qaraqııa, Beıneý aýdandarynda júrgizilip jatyr.
2021 jyly oblys boıynsha 132 360 tonna qatty turmystyq qaldyqtar jınalyp, onyń 35 787 tonnasy suryptaldy. Al 2022 jyldyń ekinshi jartyjyldyǵynda 125 myń tonna qaldyq suryptalyp, qaıta óńdeýge jóneltildi.
Oblysta qaldyqtardy qabyldaıtyn 12 pýnkt bar. Qaldyqtardy bólek jınaýmen jáne suryptaýmen aınalysatyn 10-nan astam shaǵyn bıznes sýbektileri bar.
Sondaı-aq, Munaıly aýdanyndaǵy polıgon mańynan qurylys qaldyqtaryn jınap, qaıta óńdeıtin ortalyq qurylysyn bastaý josparlanǵan. Qazir quzyrly oryndar atalǵan jobany júrgizý maqsatynda jer ýchaskesin berý jumystaryn qarastyrylyp jatyr.