Mańǵystaýda týrızmdi damytý maqsatynda 10 ortalyq ashylady
AQTAÝ. QazAqparat - Mańǵystaý oblysynda týrızmdi damytý maqsatynda dámhana men sanıtarlyq aımaqtary bar 10 ortalyq salynbaq, dep habarlaıdy Qazaqparat tilshisi.
Ortalyqtar Aqtaýdan, Beıneýden jáne Ózbekstan shekarasyna deıingi salynyp jatqan jol boıynan ashylady.
Ótken jyly óńirge 165 myń týrıst kelgen. Onyń 23 myńy sheteldik, al qalǵany qazaqstandyqtar. Mamandardyń aıtýynsha, sheteldikter tarıhı eskertkishterdi kórýge keledi eken. Aımaqta olarǵa qolaıly jaǵdaı jasaý úshin arnaıy ortalyqtar ashylmaq.
«Kóptegen týrıster eń birinshi Aqtaýǵa keledi. Sondyqtan aldymen, qaladan ashylady. Al, Beıneýde ne úshin ashamyz? Aýdanǵa Reseıden keletin týrıster kóp. Basqa oblystardan keledi. Jańa jol salynyp jatyr. Buıyrsa osy úlken joldyń boıynan salynady. Sebebi kelgen týrıst sol jerden eń birinshi aqparat alý kerek. Bilý kerek, qaıda baryp, qaı jerge ornalasýǵa bolady, qonýǵa, tamaqtanýǵa bolady, osy aqparatty alýǵa múmkinshilik bolýy kerek»,- Mańǵystaý oblystyq týrızm basqarmasy basshysynyń orynbasary Gúlmıra Súıeýova.
Sonymen birge, Ózbekstan shekarasyna deıin 85 shaqyrym jol qurylysy júrip jatyr. Joldyń uzaqtyǵy boıynsha týrısterge qajetti barlyq qolaıly jaǵdaıdy uıymdastyrý boıynsha da ortalyqtar salynady. Ortalyqtardyń ishinde ekskýrsııalyq jáne kórme ortalyǵy, syılyq, ulttyq ónimder dúkenderi bolady.
Búginde álemdik ekonomıkada týrızmniń orny erekshe. Keı elderde týrızm memleket kirisiniń birden-bir kózi. Mańǵystaýda osy salany damytý, týrısterdi tartý úshin beınerolıkter jasalmaq. Buǵan deıin ólkeniń tarıhı jerleri men eskertishteri jónindegi arnaıy beınerolıkter ońtústik jáne soltústik óńirlerde kórsetilgen. Bıyl taǵy da jańa aqparattyq túsirilimder daıyndalyp, olardy jergilikti telearnalardan kórsetý josparda bar. Sonymen qatar, týrıstik nysandarǵa aparatyn joldarǵa jóndeý jumystary júrgiziledi.
Búginde oblysta 41 týrıstik fırma tirkelgen. Evgenııa Slıýsareva, osyndaı týrfırmalardyń birin basqaryp otyr. 26 jyl buryn ashylǵan kompanııa negizinen ólketaný baǵytynda jumys isteıdi. Týrısterdi óńirdiń tarıhı jerlerimen tanystardy. Onyń aıtýynsha, sheteldik qonaqtarǵa «Kógez» etnoaýyly qyzyǵyraq.
«Kógez» etnoaýylynda bolashaqta sporttyq keshen salynady. Onda monsha, trenajerlyq zal, úlken júzý basseıni jáne sporttyq alańdar ornalasady. Munda qazir 500 aǵash bar. Bıyl taǵy 150 aǵash otyrǵyzamyz. Etnoaýylǵa týrıster kóp keledi. Sebebi, osy jerden Sherqala, Aıraqty sııaqty jerge barýǵa da bolady»,-deıdi ol.
