Mańǵystaýda týrızm salasyndaǵy 1000 maman tegin oqytylady
Aqtaýda «Kazakh Tourism» ulttyq kompanııasynyń ókilderi jergilikti qonaq úı basshylarymen kezdesti.
Kýrorttyq aımaq sanalatyn óńirde jyl sońyna deıin týrızm salasynyń 1000-ǵa jýyq mamany tegin oqytylady.
Aspaz, shveıtsar, daıashylar men bólme qyzmetkerleri, jaǵajaıdaǵy qutqarýshy mamandar biliktiligin arttyrady.
«Ótken jyly qonaq úı keshenderinde demalýshylar sany artqanyn kórdik. Sáıkesinshe, saladaǵy sapaly qyzmetkerlerdiń jetispeýshiligi baıqaldy. 2025 jylǵa deıin Mańǵystaý 1,7 mln týrısti qabyldaýdy josparlap otyrǵanyn eskersek, onda bilikti kadrlarǵa degen qajettilik arta túsedi», - dedi Ulttyq kompanııa tóraǵasy Erjan Erkinbaev.
Mamandardyń aıtýynsha Aqtaý halyqaralyq áýejaıynyń qyzmetkerleri de oqý kýrsynan ótedi.
Onda kúrdeli jaǵdaı oryn alsa týrıstermen ózara is-qımyl jasaý máselesine erekshe nazar aýdarylady.
Oqytýdan ótken qatysýshylar jergilikti kýrorttyq nysandarda jumysqa ornalasady dep josparlanǵan.
Sonymen qatar, kezdesýde QR Mádenıet jáne sport mınıstrligi Týrızm ındýstrııasy komıtetiniń tóraǵasy Dastan Ryspekov jaqynda qabyldanǵan týrızm salasyndaǵy memlekettik qoldaýdyń jańa sharalary týraly aıtty.
Týrısterdi esepke alý, týrıstik aǵymdy taldaý jáne kóshi-qon baqylaýyn júzege asyrýǵa arnalǵan biryńǵaı aqparattyq júıe – «eQonaq» jumysy tanystyryldy.
Búginde bul júıe qonaq úı, hostel, demalys úılerinde engizilgen. Jyl sońyna deıin elimiz boıynsha bul júıege 600-den astam qyzmet orny tirkeledi.
