Mańǵystaýda turǵyndardyń saýatyn ashatyn bılbordtar ilinip jatyr
AQTAÝ. QazAqparat - Mańǵystaý oblystyq sotynyń ókilderi óńir turǵyndarynyń quqyqtyq saýatyn ashý jáne olardy quqyq máselelerinen jan-jaqty aqparattandyrý maqsatynda bılbordtar ilip jatyr. Bul týraly QazAqparat tumba.kz saıtyna silteme jasap habarlaıdy.
Saıt taratqan málimetterge qaraǵanda, bul sharanyń maqsaty halyqqa jeke múlikti qorǵaý, qylmystyq quqyqty odan ári izgilendirý, sottar aınalysatyn jumystardyń aýqymy sııaqty baǵyttar boıynsha QR zańnamalaryndaǵy jańalyqtardy jan-jaqty túsindirý.
«Bılbordtar kósheler men eldi mekenderde ornalastyrylǵan. Bizdiń maqsatymyz keıbir zańnamalyq aktilerge engizilgen ózgeristerdi turǵyndarǵa jan-jaqty túsindirý. Osyndaı jolmen biz kópshiliktiń quqyqtyq saýatyn arttyramyz»,-deıdi sot ókilderi.
Sot qyzmetkerleriniń habarlaýynsha, Tupqaraǵan aýdanynyń soty Fort-Shevchenkoda bılbord ornatty. Endi turǵyndar daýly máselelerdi tek sot qana emes notarıýstar da qaraıtynyn biledi.
