Mańǵystaýda turǵyn úıdi dezınfektsııalaý kezinde eki adam kóz jumdy
ASTANA. QazAqparat - Munaıly aýdanynyń Mańǵystaý aýylynda turǵyn úıdi dezınfektsııalaý kezinde bes adam ýlanyp qaldy. Sonyń ekeýi kóz jumǵan. Bul týraly Munaıly aýdany ákimdiginiń Facebook paraqshasynda habarlandy.
Qaıǵyly oqıǵa 23 qarashada bolǵan.
«Aýdan ákimi Rahat Eltızarov jáne onyń orynbasarlary, sondaı-aq quqyq qorǵaý organdarynyń ókilderi oqıǵa ornyna barǵan. Qazirgi kezde jergilikti turǵyndar oqshaýlanǵan. Oblys bıligi osy jaǵdaıdy qatań qadaǵalap otyr», - deıdi Munaıly aýdanynyń ákimdiginiń ókilderi.
lada.kz basylymynyń habarlaýynsha, zardap shekkenderdiń ishinde kishkentaı bala da bar.
Polıtsııa qyzmetkerleriniń aıtýynsha, osy fakti Sotqa deıingi tergep-tekserýlerdiń biryńǵaı tizilimine QR Qylmystyq kodeksiniń 104-babymen («Abaısyzda qazaǵa ushyratý») tirkelgen.
Kúdikti ızolıatorǵa jiberilgen. Tıisti saraptamalar belgilendi. Sotqa deıingi tekserýler júrip jatyr.
