Mańǵystaýda týǵan kúnin dúrkiretip toılaǵan basqarma basshysy jazalandy

AQTAÝ. QazAqparat - Mańǵystaý oblysynyń ekonomıka jáne bıýdjettik josparlaý basqarmasynyń basshysy Marına Álbekova karantın kezinde saqtyq sharalaryn buzyp, týǵan kúnine oraı toı ótkizgeni úshin jazalandy. Bul jóninde QazAqparat Mańǵystaý oblysynyń taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmetine silteme jasap habarlaıdy.

«Vedomstvo úı aýlasynda jappaı is-shara ótkizý faktisin anyqtady. Laýazymdy tulǵa túsinikteme berý úshin departamentke shaqyryldy. Sondaı-aq, Ákimshilik quqyq buzý kodeksiniń 425-baby boıynsha ákimshilik jaýapkershilikke tartyldy» delingen baspasóz habarlamasynda.

QR Ákimshilik quqyq buzý kodeksiniń 425-baby 1-bóliginiń sanktsııasyna sáıkes talapty buzǵan laýazymdy tulǵalarǵa 230 AEK nemese 638 940 teńge kóleminde aıyppul salynýy tıis.

Mańǵystaý oblysynyń taýarlar men kórsetiletin qyzmetterdiń sapasy men qaýipsizdigin baqylaý departamenti oblys ákimdigi men memlekettik qyzmet isteri departamentine tıisti hat joldady.

Aıta keteıik, búgin áleýmettik jelide Mańǵystaý oblysynyń ekonomıka jáne bıýdjettik josparlaý basqarmasynyń basshysy Marına Álbekovanyń týǵan kúninen vıdeo tarady.

Ázirge sheneýnik buǵan qatysty eshqandaı málimdeme jasamady.

Avtor: Ásel Tumashqyzy