Mańǵystaýda týǵan ákesin óltirgen jigit sottaldy
ASTANA. QazAqparat - Mańǵystaýda týǵan ákesin óltirgen jigit sottaldy, dep jazady Lada.kz.
Shyǵarylǵan úkim týraly Mańǵystaý oblystyq qylmystyq ister jónindegi mamandandyrylǵan sottyń bas mamany Aıjan Sándibaeva aıtyp berdi.
Sándibaevanyń aıtýynsha, qaıǵyly oqıǵa Munaıly aýdany Atameken aýylyndaǵy otbasylardyń birinde bolǵan.
Mas kúıinde bolǵan sottalýshy men onyń ákesiniń arasynda janjal týǵan. Uly ákesine bas salǵan, alaıda ákesi qutylyp shyǵyp, kóshege júgirgen. Jas jigit ony qýyp jetip, jerge qulatyp, tunshyqtyrǵan. Er adam sol jerde qaza tapqan.
«Sot aıyptalýshyny QR QK 99-baby «adam óltirý» boıynsha kináli dep tanyp, 14 jylǵa bas bostandyǵynan aıyrdy. Úkim zańdy kúshine endi», - dedi Aıjan Sándibaeva.
