Mańǵystaýda tórt áleýmettik nysan paıdalanýǵa berildi
El ıgiline berilgen jańa ǵımarattyń biri Túpqaraǵan aýdanyna qarasty Taýshyq aýylyndaǵy 100 oryndyq «Kúnshýaq» balabaqshasy. Tárbıe oshaǵy Elbasynyń «Rýhanı jańǵyrý» baǵdarlamasynyń «Azamattyq bastamalar kartasy» bazalyq jobasy aıasynda salynǵan. Jalpy somasy 406 mln teńge jańa nysannyń ashylý saltanatyna oblys ákimi Eraly Toǵjanov qatysty.
«Elimizdiń birliginen asqan asa qadirli uǵym joq. Qazaqstannyń ósýi de, ónýi de birlik pen eldiktiń arqasy. Sonyń arqasynda ekonomıka kóterildi. Bir aýdan boıynsha balabaqsha máselesin tolyq sheshýge jaǵdaı jasalyp jatyr. Osyndaı balabaqshamen 98%-deńgeıde qamtamasyz etýge jetkeli otyrmyz. ıAǵnı, kishkentaı búldirshinderge jaqsy jaǵdaı jasaı alsaq, sonyń bári táýelsiz Qazaqstannyń jańa múmkindigi bolmaq», - dedi aımaq basshysy. Saltanatty rásimnen keıin Eraly Toǵjanov aýyl turǵyndarymen kezdesip, Mańǵystaýda júrgizilip jatqan mańyzdy strategııalyq jobalardy talqylap, aımaqtyń áleýmettik-ekonomıkalyq kórsetkishterin aıtyp berdi. Al, aqsaqaldar qaýymy óz rızashylyqtaryn bildirip, jyly lebizderin jetkizdi.
Aıtýly mereke qarsańynda alty alashqa tartý retinde esik ashqan taǵy bir nysan Aqshuqyr aýylyndaǵy Er Qosaı Qudaıke atyndaǵy sport kesheni. Sport ǵımaratynyń jalpy aýmaǵy 400 ga jerdi alyp jatyr. Munda bir mezette 400 adam jattyǵýǵa jaǵdaı jasalǵan. «Týǵan jer» baǵdarlamasy aıasynda jergilikti kásipkerlerdiń óz qarajatymen salynǵan sport kesheniniń qurylysyna 65 mln teńge jumsaldy.
Sondaı-aq, Aqshuqyr aýylynda «Jolaman» medıtsınalyq ortalyǵy saltanatty túrde el paıdasyna berildi. Emhana júrek, qan-tamyr,tis, kóz, qulaq, muryn taǵy basqa aýrýlardy qaraıtyn apparattarmen tolyq jabdyqtalǵan. Ortalyqtyń 1 mezette 15 adamdy qaraýǵa múmkindigi mol. Shaǵyn ǵana aýylymyz úshin bul úlken ortalyq deıdi, turǵyndar. Mańǵystaýda jylyna 20 myńnan astam bala dúnıege keledi. Sondyqtan qazirgi tańda ata-analar úshin eń kerekti nysan - balabaqsha. Bolashaqta oblysta bóbekjaı jetispeýshiligin tolyq joıýǵa múmkindik jasalýda. Aımaq basshysy búldirshin tárbıeleıtin taǵy bir bilim oshaǵynyń saltanatty ashylýyna qatysyp, Aqshuqyr turǵyndarynyń qýanyshyna ortaqtasty. 140 balaǵa shaqtalǵan «Alma» balabaqshasyna jeke kásipker 640 mln teńge jumsaǵan. 30-dan astam adamdy jumyspen qamtyp otyr. Aıta keteıik, bul aýyldaǵy kásipkerlerdiń qarajatyna salynǵan 7-shi balabaqsha.
Ashylý saltanaty aıtýly merekege tuspa-tus kelgen jáne bir nysan Aqshuqyr aýylynda jańa meshit. Jergilikti kásipkerlerdiń qarajatymen boı kótergen qulshylyq úıi búgin, ıaǵnı juma kúni paıdalanýǵa berildi. Birlik pen yntymaqtyń, ımandylyq pen baýyrmaldyqtyń rýhanı qaınar kózi, musylmandy bir jerge toǵystyratyn, zor máni bar rýhanı ortalyqtyń ashylýyna aýyl turǵyndary túgel jınaldy. Meshitte 1 mezette 500 adam qulshylyq ete alady. Qurylysqa halyqtan jáne jeke kásipkerlerdiń demeýshiligimen jınalǵan 50 mln teńge jumsalypty. Sharada sóz alǵan Eraly Toǵjanov: «Dinniń tazalyǵy - eldiń tazalyǵy. Eldiń tazalyǵy - halyqtyń rýhynyń bıiktigi, osynyń arqasynda qazaq eli de, halqy da bir bola alady. Basqa baǵytqa ketken elderdiń jaǵdaıy bárińizge málim. Elimizdegi birlik pen beıbitshilikti maqtan tutaıyq jáne soǵan berik bolaıyq. Imandylyqqa bastaǵan nıetpen jınaldyńyzdar. Toıymyz qutty bolsyn!», - dep óz lebizin jetkizdi.
«Taýshyq aýyl sharýashylyǵy» JShS aýyl halqyn jumyspen qamtyp, óńirdegi shaǵyn jáne orta bıznestiń damýyna úles qosyp otyrǵan sharýashylyq. Kásiporyn túıe, jylqy, qoı ósirýmen aınalysady. Taýarly mal ónimderin óndirip, halyqqa tutynýǵa shyǵarady. Seriktestik qaramaǵynda shubat shyǵaratyn tseh; jún óńdeý tsehy; mal soıý alańy; naýbaıhana; baý-baqsha; qarabalyq aýlaý sharýashylyǵy; sýsyndar shyǵaratyn tseh bar. Qazirgi tańda 2 000 túıe, 200 jylqy, 1 myń qoı ósiriledi. Kásiporynnyń jetistigi sol - elimizde «asyl tuqymdy qazaqtyń qos órkeshti aıyr túıesin ósiretin sharýashylyq» jáne «asyl tuqymdy qazaqtyń adaı jylqysyn ósiretin sharýashylyq» mártebesin ıelengen. Kásiporynda 120 adam jumys isteıdi.
